केशरी, सरस्वती र कृष्णाको तीन-तीन स्वर्ण
इटहरीः सातौं राष्ट्रिय खेलकुद प्रतियोगिताको एथलेटिक्समा त्रिभुवन आर्मी क्लबकी सरस्वती भट्टराई र कृष्णा चौधरी तथा नेपाल पुलिस क्लबकी केशरी चौधरीले आफ्नो स्वर्ण पदक संख्या तीनतीन पुर्याएका छन् । इटहरी रंगशालामा सोमबार भएको खेलमा सरस्वतीले महिला आठ सय मिटर दौड र कृष्णाले महिला दुई सय मिटर दौडमा स्वर्ण पदक जितेका हुन् । केशरीले भने महिला ट्रिपलजम्पमा स्वर्ण पदक हात पारिन् ।
सरस्वतीले निर्धारित दुरी पूरा गर्न दुई मिनेट १९.४२ सेकेन्ड समय खर्चिइन् । उक्त स्पर्धामा आर्मी क्लबकै सानुमाया कार्कीले रजत पदक हात पारिन् । उनले निर्धारित दुरी पार गर्न दुई मिनेट २५.५६ सेकेन्ड समय लगाइन् । सुदूरपश्चिमाञ्चलकी सीमाकुमारी चौधरी निर्धारित दुरी दुई मिनेट ३१.६२ सेकेन्डमा पार गर्दै तेस्रो भइन् ।
सरस्वतीले जारी प्रतियोगितामा पन्ध्र सय मिटर दौड र चार गुना चार सय मिटर रिले दौडमा पनि स्वर्ण पदक जितेकी थिइन् । २०६५ सालदेखि खेल्न सुरु गरेकी सरस्वतीले २०६८ सालमा भएको छैटौं राष्ट्रिय खेलकुदमा भने सुदूरपश्चिमाञ्चल विकास क्षेत्रको प्रतिनिधित्व गरेकी थिइन् । २३ वर्षीया सरस्वतीको घर डँडेलधुराको पोखरा हो ।
उनले ब्राजिलको रियो दी जेनेरियोमा सम्पन्न ओलम्पिक खेलकुद प्रतियोगितामा पनि राष्ट्रको प्रतिनिधित्व गरेकी थिइन् । रियो ओलम्पिकमा उनले १५ सय मिटर दौडमा चार मिनेट ३३ सेकेन्डको राष्ट्रिय कीर्तिमानसमेत बनाएकी थिइन् । त्यसअघि उक्त कीर्तिमान राजकुमारी पाण्डे (चार मिनेट ३४ सेकेन्ड) को नाममा थियो ।
सरस्वतीले सातौं राष्ट्रिय खेलकुदमा तीनवटा स्वर्ण पदक जित्दा निकै खुसी लागेको प्रतिक्रिया दिइन् । ‘तीनवटा स्वर्ण पदक जित्दा निकै खुसी लागेको छ । त्रिभुवन आर्मी क्लबबाट मैले आफ्नो खेल तिखार्ने अवसर पाएँ, यो पदक त्यसैको प्रतिफल हो', उनले भनिन् । आठ सय मिटर दौडमा उनको उत्कृष्ट प्रदर्शन भने दुई मिनेट १३ सेकेन्ड हो ।
यसैगरी दुई सय मिटर दौडमा कृष्णाले निर्धारित दुरी २६.९० सेकेन्डमा पूरा गरिन् । उक्त स्पर्धामा २७.७२ सेकेन्डको समय निकाल्दै आर्मी क्लबकै संगीता मेचे दोस्रो र २७.७३ सेकेन्डको प्रदर्शनसहित मध्यपश्चिमाञ्चलकी प्रमिला थारू तेस्रो भए । जारी प्रतियोगितामा कृष्णाले यसअघि महिला एक सय मिटर दौड र महिला चार गुना चार सय मिटर रिले दौडमा स्वर्ण पदक जितेकी थिइन् ।
पुरुष आठ सय मिटर दौडमा पनि आर्मी क्लबकै सोमबहादुर कुमाल पहिलो भए । उनले निर्धारित दुरी दुई मिनेट ०२.४७ सेकेन्डमा पूरा गरे । उक्त स्पर्धामा आर्मीका जीवन चौधरी दोस्रो र एपीएफ क्लबका हिक्मत धामी तेस्रो भए । निर्धारित दुरी जीवनले दुई मिनेट ०४.७१ सेकेन्डमा र हिक्मतले दुई मिनेट ०४.८७ सेकेन्डमा पूरा गरे ।
यसैगरी पुरुष दुई सय मिटर दौडमा मध्यपश्चिमाञ्चलका यमसाजन सुनारले बाजी मारे । उनले निर्धारित दुरी पार गर्न २१.७० सेकेन्ड समय खर्चिए । उक्त स्पर्धामा एपीएफ क्लबका आशीष चौधरी दोस्रो र आर्मी क्लबका आनन्द चौधरी तेस्रो भए । निर्धारित दुरी आशीषले २२.२२ सेकेन्ड र आनन्दले २२.२४ सेकेन्डमा पूरा गरेका थिए ।
महिला चार सय मिटर हर्डल्समा आर्मी क्लबकी दुर्गा देवकोटाले स्वर्ण पदक जितिन् । उनले निर्धारित दुरी एक मिनेट १०.१६ सेकेन्डमा पार गरिन् । उक्त स्पर्धामा एक मिनेट १०.६१ सेकेन्डको समय निकाल्दै एपीएफ क्लबकी सविता चौधरी दोस्रो र एक मिनेट १८.५० सेकेन्डको समयसहित पूर्वाञ्चलकी सविता श्रेष्ठ तेस्रो भए ।
यसैगरी पुरुष डिस्कस थ्रोमा पनि आर्मी क्लबकै विनोद राईले स्वर्ण पदक जिते । उनले ३५.४० मिटरको प्रदर्शन गरे । उक्त स्पर्धामा ३२.०३ मिटरको प्रदर्शनसहित एपीएफ क्लबका प्रेमबहादुर हुन्चिङले रजत र ३१.७५ मिटरको प्रदर्शनसहित नेपाल पुलिस क्लबका पुष्कल खड्काले कांस्य पदक जित्न सफल भए ।
महिलातर्फको ट्रिपलजम्पमा भने पुलिस क्लबकी केशरी चौधरीले बाजी मारिन् । उनले स्वर्ण पदक हात पार्ने क्रममा ११.७६ मिटरको प्रदर्शन गरेकी थिइन् । उक्त स्पर्धामा एपीएफ क्लबकी शिला चौधरीले रजत पदक हात पारिन् । उनले १०.५५ मिटरको प्रदर्शन गरिन् । आर्मी क्लबकी संगीता मेचे १०.४१ मिटरको प्रदर्शनसहित तेस्रो भइन् । केशरीले जारी प्रतियोगितामा यसअघि महिला हाइजम्प र लङजम्पमा स्वर्ण पदक जितेकी थिइन् ।
प्रतिक्रिया दिनुहोस !
