काठमाडौं: परराष्ट्रमन्त्री प्रकाशशरण महतले नेपालले भारत र चीन दुवै मुलुकसँगको सम्बन्धलाई उच्च प्राथमिकता दिएको बताएका छन् । दुवै मुलुकका स्वार्थ र आवश्यकता कसरी परिपूर्ति गर्न सकिन्छ भन्नेमा आफूहरू जानकार रहेको उनले बताए ।
'भारतसँगको सम्बन्ध चीनको सट्टामा होइन, चीनसँगको सम्बन्ध भारतको सट्टामा होइन । भारतसँग पनि राम्रो सम्बन्ध राख्न जरुरी छ । त्यो वास्तविकता हो । चीनसँग पनि राम्रो सम्बन्ध राख्नुपर्छ भन्ने कुरा हामीलाई राम्रोसँग थाहा छ', परराष्ट्रमन्त्री महतले बुधबार मन्त्रालयमा आयोजित पत्रकार सम्मेलनमा भने । अघिल्लो सरकारले चीनसँग गरेका समझदारी कार्यान्वयनमा लैजान आफूहरूले काम गरिरहेको पनि उनले बताए ।
'अघिल्लो सरकारले गरेका कतिपय समझदारीप्रति हामी प्रतिबद्ध छौं भनिराख्या छौं । त्यो सैद्धान्तिक समझदारी थियो । त्यसलाई कार्यान्वयन गर्न कयौं वर्ष लाग्छ । ६ महिनाअगाडि भएको समझदारीअनुसार रेल आइसक्ने, सडक बनिसक्ने, प्रसारण लाइन खडा भइसक्ने स्थिति हुँदैन । त्यसका लागि धेरै तह पार गर्नुपर्छ', उनले भने ।
चिनियाँ कम्युनिस्ट पार्टीका पोलिटब्युरो सचिवालय सदस्य लिउ छिपाओ र मंगोलियाका परराष्ट्रमन्त्रीको नेपाल भ्रमण एकैपटक हुनु संयोग मात्रै भएको मन्त्री महतले स्पष्टीकरण दिए ।
भिडियो हेर्नुहोस्
प्रतिक्रिया दिनुहोस !
