कमल थापाले पार्टी एकताको रहस्य यसरी खोले

भक्तपुरः राष्ट्रिय प्रजातन्त्र पार्टीका अध्यक्ष कमल थापाले राष्ट्रवादी प्रजातान्त्रिक शक्तिको निर्माणसँगै नेतृत्व गर्न दुई राप्रपाबीच एकता गरिएको बताएका छन् ।

पार्टीले बिहीबार भक्तपुरको टौमढीमा आयोजना गरेको मध्यमाञ्चलस्तरीय वृहत आमसभालाई सम्बोधन गर्दै एकीकृत राप्रपाका अध्यक्ष थापाले राष्ट्रवादी प्रजातान्त्रिक शक्तिले नै देशको नेतृत्वसमेत गर्ने बताएका हुन् ।

ठूला दलहरुको कारण मुलुकमा विदेशी शक्तिहरुको चलखेल र प्रभाव बढेको भन्दै उनले ठूला दलहरुको विकल्पको रुपमा राप्रपा अघि आउने दावी गरे ।
दुई पार्टीबीच विभिन्न मतभेद बाँकी भए पनि मुलुकको अखण्डता, स्वतन्त्रता र राष्ट्रिय एकता अक्षुण्ण राख्न पार्टी एकीकरण गरिएको उनको भनाइ थियो।

‘दुई राप्रपाबीच धेरै मतभेद बाँकी थिए तर मुलुकको स्वतन्त्रता, अखण्डता र राष्ट्रिय एकता बचाउनुपर्ने बाध्यताले पार्टी एकता गर्नु परेको हो’, अध्यक्ष थापाले स्पष्टीकरण दिए, ‘सत्ता स्वार्थले पार्टी एकता गरेका होइनौं । पार्टी एकता गरिँदा पनि हामीले हिजोको सिद्धान्त, विचार र मल्यमान्यतालाई बिर्सेका छैनौं ।’

नेता थापाले संविधानसभाको नाउँमा मुलुकमा जातीयको आधारमा संघीयताको बिजारोपण गरिएको धारणा राखे । उनले संविधानसभाकै आडमा मुलुकमा विखण्डनको आवाज उठेको र विदेशीलाई अंगीकृत नागरिकता दिने राष्ट्रघाती काम भएको सुनाए ।

ठूला दलहरुको अकर्मण्यता र असफलताले मुलुक अन्योलको दलदलमा फसिरहेको उनको भनाइ थियो । ‘सत्तामा जान विदेशीहरुको आशिर्वाद चाहिने खालको ठूला दलहरुको आत्मसमर्पणवादी सोचले मुलुक नै रहने कि नरहने अवस्थामा पु¥याएको छ’, अध्यक्ष थापाले भने, ‘जसले गर्दा राष्ट्रियता संकटमा परेको छ । धार्मिक, सांस्कृतिक, भाषिक एकता खलबलिएको छ । तर ठूला दलहरु कोठे बैठक गरेर जालझेल र भागबन्डामै मस्त छन् ।’

उनले संविधानअनुसार २०७४ माघ ७ भित्र स्थानीय, प्रदेश र संघको निर्वाचन हुने सम्भावना क्षीण बन्दै आएको बताए । राजनीतिक अस्थिरताले आर्थिक अवस्था जर्जर अवस्थामा पुगेको भन्दै उनले मुलुकमा राजनीतिक स्थिरताको लागि निर्वाचनमा जानुको विकल्प नभएको बताए ।

कार्यक्रमा राप्रपाका राष्ट्रिय अध्यक्ष पशुपति शमशेर राणाले भूकम्पपछिको पुनर्निर्माणमा उदासीन भएको भन्दै सरकारको आलोचना गरे ।

सरकारमा मन्त्री रहेका आफ्ना नेताहरुको उपस्थितिमा भएको उक्त कार्यक्रममा नेता राणाले जाडो बढेसँगै भूकम्प पीडितहरुको जीवनयापन कठिन बनेकाले पुनर्निर्माणलाई तीव्र बनाउन ध्यानाकर्षण गरे ।

पार्टीका वरिष्ठ नेता डा. प्रकाशचन्द्र लोहनीले प्रजातन्त्रको नाउँमा ठूला दलहरुको लुटतन्त्र र भागबन्डाले मुलुक आक्रान्त बनेको धारणा राखे ।

त्यस्तै कार्यक्रममा पार्टीका महामन्त्री एवं भूमिसुधारमन्त्री विक्रम पाण्डे, आपूर्तिमन्त्री दीपक बोहरा, सहमहामन्त्री भुवन पाठक, केन्द्रीय सदस्यहरु दिनेश श्रेष्ठ, रवीन्द्रप्रताप शाह, रामेश्वर थापा, नायिक रेखा थापा, गायिकाद्वय मीरा राणा र कोमल वलीलगायतले अबको निर्वाचनमा राप्रपा पहिलो पार्टी बन्ने दावी गरे ।

कार्यक्रमा नेपाल एकीकरण गरेका पृथ्वीनारायण शाह र राप्रपा भक्तपुरका प्रर्वअध्यक्ष स्व. सुरेन्द्रप्रताप शाहको तस्बिरमा माल्यार्पण गरिएको थियो । त्यस्तै कार्यक्रमअघि भक्तपुरका विभिन्न ठाउँमा निकालिएको र्याली टौमढीमा समापन गरिएको थियो ।