काठमाडौंः नेपाली साहित्य क्षेत्रका समस्या समाधानका लागि पहल गर्ने उद्देश्यसहित मंगलबार साहित्यिक संस्था समन्वय संघ नेपाल गठन भएको छ ।
पछिल्ला दिनमा नेपाली साहित्य क्षेत्रमा क्रियाशील साहित्यिक संस्थाले सरकारी उपेक्षाका कारण भोग्नुपरेका दर्ता, नवीकरण लगायत समस्या बुलन्ध गर्ने उद्देश्यले संघ गठन भएको नवगठित संघका सचिव बालमुकुन्द कार्कीले जानकारी दिए ।
विभिन्न साहित्यिक संघसंस्थाका प्रतिनिधिको सहभागितामा सम्पन्न भेलाले अभिनव साहित्य समाजका अध्यक्ष वेदमणि घिमिरे गोविन्दको अध्यक्षतामा तदर्थ समिति गठन गरेको छ ।
संघको महासचिवको जिम्मेवारी ज्योति साहित्यिक प्रतिष्ठानका अध्यक्ष मणिराज सिंहलाई दिएको छ भने सचिवको जिम्मेवारी बालमुकुन्द कार्कीले पाएका छन् । संघका सदस्यमा बाजुराम पौडेल, शीतल गिरी, डिल्ली दाहाल, बद्री अर्याल, द्वावारिका कुइँकेल, मञ्जुश्री प्रधान केसी रहेका छन् । तदर्थ समितिका पदाधिकारी र सदस्य आवश्यक परे थपघट गर्न समेत सकिने निर्णय भेलाले गरेको सचिव कार्कीले जानकारी दिए ।
तदर्थ समितिलाई आगामी माघ १५ गते हुने अर्को भेलामा साहित्यिक संस्थाहरूले भोग्नुपरेको विविध समस्याहरूको अध्ययन प्रतिवेदन पेश गर्ने जिम्मेवारी दिइएको छ ।
प्रतिक्रिया दिनुहोस !
