तीन छोरीलाई विष खुवाएर आमाद्वारा आत्महत्या
मलंगवा: सर्लाहीको पिपरिया-३ की ३० वर्षीया गुन्द्रुदेवीले तीन छोरीलाई विष सेवन गराई आफूले पनि सेवन गरेकी छिन् । उनले सर्वतमा विष मिसाएर तीन छोरीलाई खुवाएकी थिइन् । यसबाट दुईजनाको मृत्यु भएको छ भने दुईको अस्पतालमा उपचार भइरहेको छ । विष सेवनबाट गुन्द्रुदेवीकी १० वर्षीया छोरी चन्दाकुमारीको मृत्यु भएको प्रहरी उपरीक्षक सीताराम रिजालले बताए । घरमा कोही नभएको समयमा गुन्द्रुले छोरीहरूलाई विष खुवाएकी थिइन् ।
जेठी छोरी १३ वर्षीया पूजा र कान्छी छोरी तीन वर्षीया राधालाई उपचारका लागि वीरगन्ज पठाइएको छ । श्रीमान् रामाधार पण्डित मजदुरी गर्न बाहिर गएको मौका छोपेर गुन्द्रुदेवीले छोरीलाई विष खुवाएको स्थानीयले बताए । गरिबीका कारण तनावमा रहेकी गुन्द्रुले विषसेवन गरेको हुन सक्ने स्थानीयको अनुमान छ ।
सर्वत गन्हाएको भनेर थोरैमात्र खाएकी कान्छी छोरीले घरका अन्य सदस्यले बान्ता गर्न थालेपछि हल्ला गरेकी थिइन् । उनको हल्लापछि गाउँलेले थाहा पाएर चारैजनालाई उपचारका लागि जिल्ला अस्पताल मलंगवा लगेका थिए । अस्पताल पुर्याउँदा दुईजनाको मृत्यु भइसकेको प्रहरी नायब उपरीक्षक रिजालले बताए । तरकारी बारीमा छर्नका लागि राखेको विष गुन्द्रुदेवीले सर्वत बनाउन प्रयोग गरेकी थिइन् ।
छोरा गाईबस्तु चराउन गएको र अर्की छोरीले भने खान नमानेकाले उनीहरूलाई केही भएको छैन । प्रहरीको प्रारम्भिक अनुसन्धानमा गुन्द्रुदेवीले आफू पनि मर्ने र सन्तानलाई पनि मार्ने योजनाअनुसार विषसेवन गरे-गराएको देखिएको छ । उनले विषको सिसी माटोभित्र लुकाएर राखेकी थिइन् । खनेर माटोमुनिबाट सिसी निकालेर प्रयोग गरेको प्रहरीको भनाइ छ । श्रीमान्ले विष राखेको ठाउँ नदेखून् भन्ने उद्देश्यले लुकाएर राखेको हुन सक्ने रिजालको भनाइ छ ।
स्थानीयले भने छोरीलाई मात्र विष खुवाएर आफू मर्न खोज्नुले पारिवारिक तनाव पनि हुन सक्ने अनुमान गरेका छन् ।
प्रतिक्रिया दिनुहोस !
