बटुवाले कहिले चेत्ने ?

काठमाडौं: सडक प्रयोगकर्तालाई अनुशासन सिकाउन ट्राफिक प्रहरीले फलफूल मात्रै बाँडेन, एक घन्टा सडकमै कक्षासमेत लियो । यति गर्दा पनि सडक प्रयोगकर्तामा अझै सचेतना आएको छैन । सडक प्रयोगकर्ताकै सानो गल्तीले पनि दुर्घटना जोखिम बढेको ट्राफिक प्रहरीको भनाइ छ ।

सर्वसाधारण सडकमा भएका आकासे पुल, जेब्राक्रस र सडक लेनको प्रयोग गर्न अझै पनि हिचकिचाउने गरेको प्रहरीको दाबी छ । नजिकै जेब्राक्रस रहे पनि थोरै हिँड्नुको अल्छीले पैदलयात्रुले जथभावी बाटो काट्दा हुने जोखिम रोक्न अहिले ट्राफिक प्रहरीलाई धौधौ परेको छ । आकासे पुलबाट बाटो काट्ने प्रयोगकर्ताको संख्या कम रहेको ट्राफिकको भनाइ छ ।

सवारी चालकले जरिवाना र एक घन्टा कक्षा लिनुपर्ने भएपछि सडक लेन भने जसोतसो मान्दै आएको ट्राफिक प्रहरीले बताएको छ । उपत्यकामा २१ स्थानमा आकासे पुल छन् । तर सडक प्रयोगकर्ताले त्यसको प्रयोग न्यून मात्रामा मात्र गर्दै आएका छन् । पुलका खुड्किला चढ्न अल्छी मानेर छिटोछरितोका लागि सकभर सडकबाटै बाटो काट्न रुचाउनेहरूको ठूलो जमात रहेको महानगरीय ट्राफिक प्रहरी महाशाखाका प्रमुख डीआइजी प्रकाश अर्यालले बताए ।

आकासे पुलबाट बाटो नकाट्दा हुने जोखिमबारे थाहा पाउँदापाउँदै पनि जबर्जस्ती सवारीसाधनलाई हातले इसारा गर्दै पैदलयात्रीले सडकबाटै बाटो काट्दै आएको उनको भनाइ छ । 'आँखाअघि आकासे पुल छ । तर पैदलयात्रीले सडकबाटै बाटो काट्छन्', उनले भने, 'धेरैपटक सम्झाइयो, तर व्यवहारमा कहिल्यै परिवर्तन आएन ।'

सवारीसाधनको चाप बढी हुने सडक जमल, भोटाहिटी, पुरानो बसपार्क, न्यूरोड गेट, गोंगबु, पुल्चोक, लोकन्थली र कौशलटारमा रहेका आकासे पुलको समेत प्रयोग कम गर्ने गरेको उनको भनाइ छ । 'दुर्घटनाका कारकमध्ये सडक प्रयोगकर्ताको लापरबाही र गैरजिम्मेवारी पनि एउटा पर्छ', डीआईजी अर्यालले भने, 'पैदलयात्रीले जथाभावी बाटो काट्ने, सवारीसाधन सडकको लेन नमान्ने र जहाँ पायो त्यही रोक्ने, यात्री पनि जता मन लाग्यो उतै गाडी रोक्ने गर्छन् । यस्ता कुरामा सडक प्रयोगकर्ताले कहिले चेत्ने ।'

४२ प्रतिशत सडक दुर्घटना पैदलयात्रीकै कारण हुँदै आएको महाशाखाको भनाइ छ । सडक प्रयोगकर्तामा ज्ञानको कमी र ज्ञान भएकाहरूबाट समेत ट्राफिक नियम उल्लंघन गर्ने प्रवृत्तिका कारण उपत्यकाको ट्राफिक व्यवस्थापन चुनौतीपूर्ण बन्दै गएको डीआईजी अर्यालको भनाइ छ ।

सडकमा के गर्ने र नगर्ने ?
- हतार गरेर बाटो नकाटौं ।
- मोडहरूबाट बाटो नकाटौं ।
- रातको समयमा चम्किलो लुगा लगाएर मात्र बाटो काटौं ।
- सडकमा सधैं फुटपाथबाट मात्र हिँड्ने बानी बसालौं ।
- बालबालिकासँग यात्रा गर्दा उनीहरूलाई सडकको भित्तापट्टि पारेर अघि बढौं ।
- आफूतर्फ आइरहेको गाडीको हर्कत बुझौं ।
- सवारी आवागमनमा बाधा अवरोध पुग्ने गरी नहिँडौं ।
- रोकिराखेको ठूलो सवारीको अघिपछिबाट बाटो नकाटौं ।
- जेब्राक्रस र आकासे पुलबाट मात्रै बाटो काटौं ।