काठमाडौं: मिर्गौला रोगीका लागि वीर अस्पतालमा चौबीसै घन्टा डायलासिस सेवा सुरु भएको छ । बिरामीलाई सुविधा दिने उद्देश्यले दिउँसोमात्र दिइँदै आएको डायलासिस सेवा गत आइतबारदेखि चौबीसै घन्टा बनाइएको निर्देशक डा. भूपेन्द्र बस्नेतले बताए । दैनिक १४ जनाको डायलासिस हुँदै आएकोमा अब २८ जनाले सेवा पाउनसक्ने उनले बताए ।
वीरमा २५ वर्षअघि डायलासिस सेवा सुरु भए पनि पर्याप्त स्रोत र उपकरण नहुँदा आकस्मिक भर्ना भएका र नयाँ बिरामीले लामो समयसम्म पालो नपाएर अन्यत्र जानुपर्ने बाध्यता थियो । 'स्वास्थ्यमन्त्री गगन थापाले देशभर डायलासिस सेवा बढाउने भनेपछि हामीले पनि थप सेवा दिन लागेका हौं', बस्नेतले भने ।
अहिले वीरमा सातामा ४२ जनाले नियमित डायलासिस गराउँदै आएका छन् । यसै वर्ष मात्रै सरकारले सम्पूर्ण डायलासिस सेवा पूर्ण निःशुल्क गरेको छ । देशभरका सरकारी र निजी गरी ४३ अस्पतालबाट यो सेवा सञ्चालन भइरहेको छ ।
मानसिक स्वास्थ्य सेवा उपचार निर्देशिका
स्वास्थ्य मन्त्रालयले मानसिक स्वास्थ्य समस्याको उपचार प्रदान गर्न 'निर्देशिका' ल्याएको छ । प्राथमिक स्वास्थ्य सेवा पुनर्जागरण महाशाखाले तयार पारेको निर्देशिकामा उदासीनता, चिन्ता, छारेरोग, गम्भीर मानसिक समस्या, लागूपदार्थजन्य मानसिक समस्याको पहिचान, उपचार र व्यवस्थापनको पद्धतिबारेमा उल्लेख छ । महाशाखाका निर्देशक मोहम्मद दाउदका अनुसार जिल्ला अस्पताल, प्राथमिक स्वास्थ्य केन्द्र र स्वास्थ्य चौकीका स्वास्थ्यकर्मीले मानसिक स्वास्थ्य तालिम लिएपछि यो निर्देशिकालाई आधार मानेर सेवा सुरु गर्नेछन् ।
नेपालमा नसर्ने रोगका कारण ६० प्रतिशत व्यक्तिको मृत्यु भएको बताउँदै दाउदले भने, 'नसर्ने रोगको समस्या बढ्दै आएकाले आर्थिक वर्ष २०७३÷०७४ देखि नै वार्षिक कार्यक्रममार्फत अन्य नसर्ने रोगका साथै मानसिक स्वास्थ्य समस्या उपचार कार्यक्रम सुरु गर्न लागेका हौँ ।'
पहिलो चरणमा इलाम र कैलालीबाट सुरु गरी यसै वर्ष मकवानपुर, रौतहट, म्याग्दी, अछाम, पाल्पा, बर्दिया, सुर्खेत र बागलुङमा नसर्ने रोगबारे कार्यक्रम गर्ने महाशाखाले जनाएको छ । रासस
प्रतिक्रिया दिनुहोस !
