भैरहवाः हात खाली नजाने विशेष ग्राहक योजनासहितको अभियान लिएर अगाडि बढिरहेको अन्नपूर्ण रोड सोको टोली बुधबार भैरहवा आइपुगेको छ ।
अन्नपूर्ण पोस्ट् राष्ट्रिय दैनिक बुटवल क्षेत्रीय कार्यालयको टोली, अन्नपूर्ण पोस्ट् पत्रिका र अन्नपूर्ण टुडे म्यागजिनका सम्बन्धमा स्थानीयबाट सुझाब संकलन र नयाँ ग्राहक योजनासहित भैरहवामा रोड सो सुरु गरिएको हो । रोड सोमा क्षेत्रीय कार्यालयबाट आएका बजार प्रतिनिधि, कर्मचारी र संचारकर्मी सहभागी थिए ।
टोलीले भैरहवाको मुख्य बजार बैंकरोड, मैत्रीपथ, मिलनचोक, बुद्धचोक, देवकोटाचोक, गल्लामन्डी, पक्लिहवा, बीपी पथ, लुम्बिनी रोड, एयरपोर्ट, अन्नपूर्ण टोल, नयाँ कोलोनी, शान्तिनगर, नारायणपथ, नयाँ सडक, वेलहिया, आँखा अस्पताल लाइन र सुनौली बजारमा रोड सोको आयोजना गरिएको क्षेत्रीय कार्यालय प्रमुख रामबन्धु पौडेलले बताए ।
यसैबीच रोड सो कार्यक्रममा ग्राहक बन्दै इनोभेटिभ डेभलपमेन्ट बैंकका प्रमुख कार्यकारी अधिकृत देवेन्द्रबहादुर रावतले अन्नपूर्ण पोस्ट् राष्ट्रिय दैनिक पत्रिकाहरुमध्ये राम्रो भएको र विशेष योजनासहित आएकोमा झनै खुसी लागेको बताए ।
यसैगरी एभरेस्ट फाइनान्स लिमिटेडका प्रमुख कार्यकारी अधिकृत खिमबहादुर कार्कीले पनि पत्रिकाले मुलुकको अर्थतन्त्रलाई महत्व दिएर अर्थतन्त्र विशेष पेज नियमित प्रकाशन गरेकोमा प्रसन्नता व्यक्त गरे ।
अन्नपूर्ण राष्ट्रिय संस्करणमा प्रकाशन भई भैरहवा बजारमा स्थानीय पत्रिका जसरी बिहानै आइपुग्ने हुँदा पनि पत्रिकाप्रति अकर्षण बढेको कार्यक्रमका सहभागी नागरिक पुस्तक पसलका प्रोप्राइटर केशव यादवले बताए ।
रोड सो अभियानमा विभिन्न व्यक्ति, व्यापारी, संघसंस्थाले उत्साहपूर्वक सहभागिता जनाएका थिए । अन्नपूर्ण पोस्ट्को वार्षिक ग्राहक बन्नेले हात खाली नजाने एक हजारको स्क्र्याच कुपन पाउनेछन् । साथै लक्की ड्रबाट एक करोड २५ लाख नगद वा बंगलासहित साप्ताहिक र मासिक उपहार पाउनेछन् ।
प्रतिक्रिया दिनुहोस !
