हुम्लामा हिमपातः तापक्रम माइनस १०

सिमकोटः लामो समयदेखि खडेरी परेको हुम्लामा यो वर्षकै पहिलो पटक हिमपात भएको छ ।  बिहीबार राती २ बजे देखि शुरु गरेको हिमपातले उत्तरका लिमी, मुचु, खगालगाउँ, स्याँडा, हेप्क्का र बरगाउँ, सिमकोट लगायतका गाविस बढी प्रभावित भएका छन् ।

धेरै लामो समय पछि परेको हिउँले चीनसँग सीमा जोडिएको उतरी गाविस लिमीका बासिन्दालाई घरबाट बाहिर निस्कन समेत समस्या परेको लिमीबाट छिरङ्ग तामाङ्गले जानकारी दिए ।

उनका अनुसार लिमिमा झण्डै साढे फिट जती हिउँ जमेकाले घरबाट बाहिर आवातजावत गर्नमा समस्या भएको हो । हिउँले जिल्लाको लिमि, मुचुको तापक्रम माइनस १५ भन्दा माथि भएको मुचु प्रहरी चौकीलाई उदृत गर्दै जिल्ला प्रहरी कार्यालय हुम्लाले जनाएको छ ।

हिउँले सिमकोटको तापक्रम माइनस १० मा झरेको सिमकोट विमान स्थल श्रोतले जनाएको छ । पुष महिनासँग दिउँसोको तापक्रम माइसमा झरेको सदरमुकाम सिमकोटको तापक्रम निकै तल झरेको सहकायक प्रमुख जिल्ला अधिकारी ऋद्धीप्रसाद सिटौलाले बताए ।

हिमपातले कुनै अप्रीय घटना नघटेको जानकारी दिएका अधिकारी सिटौलाले चिसोबाट बालबालिका र वृद्धवृद्धा निकै पीडित भएको बताए ।

किसान खुशी

हिउँ परेपछि हुम्लाका किसान खुशी भएका छन् । गत असोज अन्तिम सातादेखि परेको चर्को खडेरीका कारण झण्डै २० प्रतिशत गहुँ बाली छर्न नपाएका कृषक हिउँसँग खुशी भएको जिल्ला कृषि विकास कार्यालय हुम्लाले जनाएको छ । हिउँ परेपछि सदरमुकाम सिमकोटमा बाँकी रहेको जौ छर्ने काम समेत शुरु गर्ने सिमकोट ५ की परेउकली रावतले जानकारी दिईन् ।

हिउँसँग परेको पानीले जिल्लाको दक्षिण भेगमा कृषकलाई समेत केही आशा जगाएको कालिका ४ का दिपबहादुर रोकायाले जानकारी दिए । ‘पानी त निकै कम परेको छ तर अव वर्षा शुरु हुने भयो भनेर हामीलाई आशा लागेको छ । यो पानीले थोरै भएपनि पाखोमा छरेका गहुँलाई उमार्ने र उम्रेका गहुँलाई केही राहत गर्ने काम गरेको छ ।’उनले भने ।

चिसोले तीन प्रहरी चौकी सरे

हिमपातले अत्याधिक चिसो बढेपछि जिल्लाको उत्तरी क्षेत्रका ३ वटा प्रहरी चौकी स्थानान्तरण भएका छन् । नेपाल चीन सिमानाको हिल्सा प्रहरी चौकी, यारी प्रहरी चौकी र लिमीको प्रहरी चौकी चिसोले सरेको जिल्ला प्रहरी कार्यालय हुम्लाले जनाएको छ ।

हिउँदको समयसँगै तापक्रम माइनस १० भन्दा बढी भएर खप्न नसकेपछि केन्द्रसँगको परामर्शमा प्रहरी चौकी सिमकोट र मुचुमा स्थानान्तरण गरिएको प्रहरी प्रमूख कमल प्रसाद नेपालले जानकारी दिए । उनका अनुसार लिमिको सुनखानी प्रहरी चौकीलाई सदरमुकाम सिमकाटमा सारिएको छ भने यारी र हिल्सा प्रहरी चौकीलाई मुचु प्रहरी चोकीमा स्थानान्तरण गरिएको छ ।

हिल्सा, यारी र लिमीमा प्रहरीको उर्पयुक्त भवन नभएकाले बस्न नसकेर सारिएको हो । हरेक वर्ष पुष देखि चैत्रसम्म सारिने प्रचलन अनुशार नै यस वर्षपनि प्रहरी चौकी स्थानान्तरण गरिएको प्रहरी प्रमुख नेपालले अन्नपूर्णलाई जानकारी दिए ।