जाजरकोट-जुम्ला सडकमा पुल निर्माण अलपत्र
जाजरकोटः जाजरकोट–जुम्ला सडकको छेडा–कचाली खण्डको मोर्क खोलामा पुल बन्न थालेको पाँच वर्ष बित्यो तर अहिलेसम्म पूरा हुन सकेको छैन । सडक खण्डको मोर्क खोलामा बन्ने मोटरेबल पुल नबन्दा यातायात सञ्चालनमा कठिनाइ भएको छ । निर्माण व्यवसायीको चरम लापरबाहीका कारण पुलको निर्माण अलपत्र परेको हो । सम्बन्धित व्यवसायीको लापरबाहीले १५ महिनामा निर्माण सम्पन्न गर्नुपर्ने उक्त पुलको पाँच वर्ष बित्दा पनि जग मात्र ठडिएको छ ।
पुल निर्माणको जिम्मा सर्वउद्धार प्रन्डस जेभी कोटेश्वर काठमाडौंको फर्ममार्फत जाजरकोट सुवानाउलीका कर्णबहादुर थापाले लिएका थिए । १५ महिनामा निर्माण सम्पन्न गर्ने गरी २०६९ मा ठेक्का सम्भmौता भएको पुलको ठेकेदारले समयमा काम नगर्दा अलपत्र परेको छ ।
तीनपटक म्याद थप गर्दा पनि काम पूरा हुन सकेको छैन । समयमा निर्माण नहुँदा यातायात सञ्चालनमा समस्या भएको छ । पुल निर्माण नहुँदा स्थानीय बासिन्दालाई समस्या भएको छ । स्थानीयहरू जोखिम मोलेर खोलाबाट वारपार गर्ने गरेका छन् । महिला, बालबालिका, वृद्धवृद्धा, अपांगलाई खोला तर्न समस्या हुने गरेको छ । साना बालबालिकालाई विद्यालय आउजाउ गर्न समस्या छ ।
जिल्लाको पश्चिम सिमा, जुँगाथापाचौर, साल्मा, दसेरा, मजकोट, दह, गर्खाकोट, पजारु, झाप्रा, टालेगाउँ, पैकलगायत १५ गाविस, जुम्ला तथा उत्तरी बारेकोटका बासिन्दालाई समस्या भएको छ । स्थानीयले निर्माण व्यवसायीलाई कडा कारबाहीको माग गरेका छन् ।
खोला बढ्दा दैनिक उपभोग्य सामान तथा निर्माण सामग्री ढुवानीमा बाधा पुगेको छ । बालुवाबजारको यायायात बन्द भएको छ । यातायातका साधन मोर्क बजारमै थन्किएका छन् । निर्माणको जिम्मा लिएको ठेकेदारले काम नगरेर दोस्रो व्यक्तिलाई जिम्मा लगाउँदा निर्माणको काम अलपत्र परेको जिविसले जनाएको छ । व्यवसायीले तोकेको समयमा पुल नबनाउँदा यस क्षेत्रका बासिन्दालाई आवतजावतमा समस्या हुनुको साथै अन्य विकास निर्माणमा पनि बाधा पुगेको सिमा ९ स्यापीका पूर्णसमीर महताराले बताए ।
पुल नबन्दा थलह बजारसम्मको २५ किलोमिटर सडकमा यातायात चल्न सकेको छैन । सडक बने पनि यातायातको सुविधा नहँुदा स्थानीयलाई आवताजावतमा सास्ती हुने गरेको छ । पटकपटक ताकेता गर्दा पनि निर्माण कार्यले गति लिन सकेको छैन । यो पुल स्थानीय सडक पुल आयोजनाद्वारा १ करोड ४३ लाख लागतमा निर्माण गर्ने स्टिमेट गरिएको थियो ।
पुल निर्माणका लागि हालसम्म ६० लाखभन्दा बढी रकम खर्च भइसकेको छ । २५ मिटर लम्बाइ र ४ मिटर चौडाइ भएको पुलका लागि पेस्की रकमबराबरको कामसमेत हुन सकेको छैन । व्यवसायीले प्रतिस्पर्धामा कामको जिम्मेवारी लिने अनि काम सम्पन्न गर्नेतर्फ बेवास्ता गर्ने प्रचलनले समस्या भएको स्थानीय विकास अधिकारी इन्द्र गौतमले बताए । काम छिटो सम्पन्न गर्न निर्माण कम्पनीलाई ताकेता गरिएको स्थानीय विकास अधिकारी गौतमले बताए ।
जाजरकोट–जुम्ला सडकको छेडा–थलह कचाली खण्डको मोर्क खोलामा पाँच वर्षदेखि अलपत्र परेको पुल ।अन्नपूर्ण
प्रतिक्रिया दिनुहोस !
