ढिस्कोमा पुरिएर हिमाञ्चलमा चार नेपालीको मृत्यु
महेन्द्रनगर: ढिस्कोमा पुरिएर भारतको हिमाञ्चल प्रदेशमा चारजना नेपाली मजदुरको मृत्यु भएको छ । भारतको हिमाञ्चल प्रदेशमा सडक खन्ने क्रममा पुरिएर चारैजनाको घटनास्थलमै मृत्यु भएको परिवारजनले जानकारी दिएका छन् । सिमला जिल्ला तहसिल रामपुरमा बाटो खन्ने क्रममा उक्त घटना भएको हो ।
झलारी पिपलाडी नगरपालिका ११ का एकै घरका २ जना, एकजना बैतडी र एकजना कैलालीका युवकको बाटो खन्ने क्रममा पहाडबाट खसेको ठूलो ढिस्कोले मृत्यु भएको घटनास्थलबाट टेलिफोनमा नरेन्द्रबहादुर विष्टले जानकारी दिएको उनका काका झलारीका स्थानीय गणेश विष्टले जानकारी दिए ।
उनका अनुसार मृत्यु हुनेमा कञ्चनपुरको झलारीपिपलाडी नगरपालिका-११ दीपनगरका २२ वर्षीय दीपेन्द्र विष्ट, सोही ठाउँका २१ वर्षीय लोकेन्द्र विष्ट, कैलाली सुख्खड घर भएका अन्दाजी २४ वर्षीय अजबबहादुर विष्ट र बैतडीको मटैराज ४ घर भएका २६ वर्षीय रामबहादुर बम छन् ।
'घटनामा मृत्यु भएका चारैजनाको शव ढिस्कोबाट निकालिएको छ', स्थानीय गणेश विष्टले भने, 'उनीहरूको शव क्षतविक्षत अवस्थामा छ' । चारैजनाको शव घटनास्थलबाट निकाली सकिएको जानकारी प्राप्त भएको उनले बताए । घटनाका बारेमा घटनास्थलमै रहेका उनका भतिजा नरेन्द्र विष्टले जानकारी गराएका हुन् ।
६ जनाको नेपाली त्यहाँ सडक खन्ने काम गर्दै आए पनि अन्य २ जना खाना पकाइरहेकाले सकुशल रहेका छन् । घटनामा नेपालीसहित अन्य सातजना भारतीय मजदुरको पनि मृत्यु भएको बताईएको छ ।
मृतक दीपेन्द्र विष्ट गत मंसिरमा मात्रै कामका लागि गएका थिए भने लोकेन्द्र ४ महिनाअघि कामका लागि सिमला पुगेका थिए । मृतक दीपेन्द्रका काका गणेश विष्टले मजदुरीका क्रममा मृत्यु भएका चारैजनालाई क्षतिपूर्ति दिन नेपाल सरकारले पहल गरिदिनुपर्ने बताए ।
भारतको हिमाञ्चल प्रदेशमा सुदूरपश्चिम तथा मध्यपश्चिमका धेरैजसो नागरिक सडक निर्माण गर्ने, स्याउँ टिप्ने, खेतीपाती लगाउनेलगायतका काम गर्दै आएका छन् ।
प्रतिक्रिया दिनुहोस !
