काठमाडौः पाँच करोडको लगानीमा धरहराको पछाडि ताहा गल्लीमा सस्तो फेसन बजार सञ्चालनमा आएको छ ।
नेपाली ग्राहकका लागि एउटै छानामुनि सस्तो मूल्यमा ब्रान्डेड तथा गुणस्तरीय सामान उपलब्ध गराउने उद्देश्यले नेपालमै पहिलो पटक सस्तो फेसन बजार सञ्चालनमा आएको हो । बजार सञ्चालनमा आएसँगै आम उपभोक्ताले सुन्धारास्थित ताहा गल्लीमा सस्तो मूल्यमा गुणस्तरीय फेसनका सामान खरिद गर्न सक्नेछन् ।
अन्य स्थानमा खोलिएका पसलभन्दा यहाँका बजारमा ४० प्रतिशतसम्म सस्तो मूल्यमा फेसनका सामान उपलब्ध गराउने व्यवस्था गरिएको सस्तो बजारका सञ्चालक सुरेश लामिछानेले जानकारी दिए ।
‘उत्पादकले सोरुमका रूपमा सामान बिक्रीवितरण गर्ने भएकाले उपभोक्तालाई सस्तो पर्नेछ,’ सञ्चालक लामिछानेले भने, ‘यो बजारमा १० हजारदेखि १६ हजार रुपैयाँमा सटर भाडामा लगाइएको छ जसले उपभोक्तालाई बजारमा सामान किन्दा सस्तो पर्ने भएको हो ।’
बजारमा ३६ वटा व्यवस्थित पसल राखिएका छन् । सस्तो बजारमा पुरुष तथा महिलाका लुगा, बिहेमा प्रयोग गरिने लुगा, नेपाली राष्ट्रियता झल्किने लुगा, महिला तथा पुरुषका लागि सैलुन, जुत्ता, कस्मेटिक्स, मोबाइल, मोटरसाइकल, फेन्सी, अन्डर गार्मेन्टलगायतका पसल सञ्चालन गरिएका छन् । बजारमा पार्किङको सुविधा पनि छ ।
लामिछानेका अनुसार बजार निर्माणका लागि पाँच करोड रुपैयाँ लगानी भएको छ । यो बजारमा राष्ट्रिय पोसाक दौरा सुरुवाललाई एक हजार ६ सय रुपैयाँमै तयार गरेर उपलब्ध गराइनेछ ।
त्यसैगरी, जाडो समयका लागि हजार रुपैयाँदेखि नै गुणस्तरीय ज्याकेट उपलब्ध गराएको छ । हेयर स्टाइलिङ, फेसियलजस्ता सुविधा पनि ५० प्रतिशतभन्दा सस्तो मूल्यमा उपलब्ध गराइनेछ । सस्तो बजारमा ४/५ हजार रुपैयाँमै गुणस्तरीय साडी उपलब्ध छन् ।
बजार सञ्चालन भएको अवसरमा शैलुनमा आउने प्रत्येक ग्राहकलाई फेसवासलगायतका सामग्री उपहारस्वरूप प्रधान गरिनेछ । सबै ब्रान्डका मोबाइलहरू सस्तो मूल्यमा उपलब्ध गराउनुका साथै केही ब्रान्डका मोबाइल खरिदमा ५० प्रतिशतसम्म छुटको व्यवस्था गरिएको छ ।
त्यस्तै, हरेक मोबाइल किन्दा ग्राहकले आकर्षक उपहार पाउनेछन् । त्यसैगरी, सस्तो बजारमा आउने उपभोक्ताले २५ सय रुपैयाँ ब्यालेन्स भएको सिमकार्ड उपहारस्वरूप प्राप्त गर्न सक्नेछन् । फेसन सस्तो बजार डटकममार्फत अनलाइन सामान बिक्री गर्ने व्यवस्था पनि गरिएको छ ।
प्रतिक्रिया दिनुहोस !
