ट्याक्सीमा बिलिङ प्रिन्टर जडान सुस्त

काठमाडौंः सरकारले ट्याक्सी चालकको मनोमानी रोक्न बिलिङ मिटर जडानकार्य सुरु गरेको एक महिनामा ७२ वटा ट्याक्सीमा बिलिङसहितको प्रिन्टर मिटर जडान भएको छ । सरकारले गत मंसिर २३ गतेदेखि प्रिन्टर जडान थालेको हो ।

गुणस्तर तथा नापतौल विभागले मंसिर २३ गतेबाट यो नियम लागू गरे पनि तीन सातापछि पुस १७ गतेबाट भने आलोपालो प्रणाली लागू गरेको थियो । आलोपालो प्रणालीमा तालिका बनाई छ महिनामा बागमती अञ्चलमा दर्ता भएका सबै ट्याक्सीमा बिलिङ मिटर जडान गरिसक्ने योजना विभागको छ । साउन ७ गतेभित्र राजधानीमा सबै ट्याक्सीमा बिलिङ मिटर जडान भइसक्नुपर्नेछ ।

विभागको ट्याक्सी तथा टेम्पो एकाइले तीन सातासम्म आफूखुसी प्रिन्टर मेसिन जडान गर्न आग्रह गर्दै काम सुरु गरेको थियो । गत पुस १७ गतेबाट भने लटअनुसार एक साताको समयावधि तोकेर प्रिन्टरसहितको बिलिङ मेसिन जडान थालेको हो ।

एकाइका प्रमुख विकास ध्वन्जुका अनुसार पुस १७ देखि २२ गतेसम्म बा २ ज ३००० देखि बा २ ज ३२०० नम्बर प्लेटका २ सय ट्याक्सीलाई प्रिन्टरसहितको बिलिङ मेसिनका लागि कार्यालयमा बोलाए पनि ५० वटामात्र ट्याक्सी मेसिन जडान गर्न आएका थिए ।

८० भन्दा बढी ट्याक्सी चालकले भने आर्थिक समस्या देखाउँदै एक साताको समय थप माग गरेको ध्वन्जुले बताए । अब बिस्तारै यो क्रम अघि बढ्ने आशा उनले व्यक्त गरे । आफ्नो पालामा बिलिङ मिटर जडान गर्न नआउने र अटेर गर्र्नेलाई भने गुणस्तर तथा नापतौल ऐन, ट्राफिक नियम र यातायात व्यवस्था ऐनअनुसार कारबाही हुने ध्वन्जुले बताए ।

बिलिङ प्रिन्टर जडान गर्न नआउने ट्याक्सी चालकलाई कारबाही हुने

उपत्यकामा मात्रै १० हजारभन्दा बढी ट्याक्सी गुड्ने गरेका छन् । उपत्यकासँगै देशका अन्य ठाउँमा दर्ता भएका ट्याक्सीमा समेत क्रमशः बिलिङ प्रिन्टरसहितको मिटर जडान गरिने विभागले जनाएको छ । अहिले देशभरमा करिब ३० हजार ट्याक्सी छन् ।

प्रधानमन्त्री पुष्पकमल दाहालको निर्देशनमा विभागले बिलिङ मिटर जडानको कामलाई अगाडि बढाएको हो । यसले कुनै पनि उपभोक्ता ठगीमा परेको अवस्थामा कारबाही गर्न सहज हुने विभागका महानिर्देशक विश्वबाबु पुडासैनी बताउँछन् । विभागले म्यानुयल तथा डिजिटल मिटरबाट उपभोक्ता ठगी हुने क्रम नघटेको बन्दै प्रिन्टरसहितको मिटर जडान सुरु गरेको हो ।

बिलिङ मिटर नभए नवीकरण नहुने

मिटर नवीकरण गर्न जाने ट्याक्सी चालकले अनिवार्य रूपमा बिलिङ प्रिन्टर मेसिनसहित जानुपर्छ । बिलिङ मिटरबिना नवीकरण गर्न जाँदा मिटर नवीकरण नहुने ध्वन्जुले बताए । नवीकरण गर्दा तीन सय रुपैयाँ खर्च हुन्छ । नयाँ मिटर दर्तामा ३ सय रुपैयाँ खर्च हुन्छ ।

ट्याक्सीमा प्रयोग भएको मिटरले प्रिन्टर मेसिन सपोर्ट गरेको अवस्थामा नयाँ मिटर आवश्यक नपर्ने उनले बताए । मिटरले काम नगरेको अवस्थामा भने व्यवसायीको पाँच हजारदेखि ८ हजार रुपैयाँसम्म खर्च हुन्छ । बिलिङ मिटरमा ट्याक्सी नम्बर, यात्रा गर्नेको नाम, रकम, गुडेको किलोमिटर र चालकको समेत नाम हुन्छ । यसले गर्दा ठगी गर्ने ट्याक्सीलाई सहजै कारबाहीको दायरामा ल्याउनसक्ने पुडासैनीको दाबी छ ।

आफू ठगिएको शंका लागेमा तिरेको बिलसहित ट्राफिक प्रहरीसमक्ष उजुरी गर्न सकिने व्यवस्था हुन्छ । ट्याक्सीमा यात्रा गर्दा सुरुमा १४ रुपैयाँ र त्यसपछि प्रति २ सय मिटरमा ७ रुपैयाँ २० पैसाका दरले एक किलोमिटरमा ३६ रुपैयाँ तिर्नुपर्छ । योभन्दा बढी रकम बिलमा आएको शंका लाग्नासाथ यात्रुले उजुरी गर्न पाउनेछन् ।