उपाधिका लागि आर्मी र मनाङ भिड्ने

हेटौंडाः दोस्रो टुबोर्ग हेटौंडा अन्तर्राष्ट्रिय गोल्डकप फुटबल प्रतियोगिताको उपाधिका लागि विभागीय टोली त्रिभुवन आर्मी क्लब र मनाङ मस्र्याङ्दी क्लब भिड्ने भएका छन् । शुक्रबार भएको खेलमा जित हात पार्दै आर्मीले मनाङसँगको उपाधि भिडन्त पक्का गरेको हो । प्रतियोगिताको साविक विजेता मनाङ यसअघि नै फाइनलमा पुगिसकेको छ ।

आर्मीले शुक्रबार स्थानीय प्राइम पोलिक्लिनिक विजय युथ क्लबलाई अतिरिक्त समयमा ४-१ गोल अन्तरले पराजित गर्दै अन्तिम दुईमा स्थान सुरक्षित गरेको हो । हेटौंडास्थित वनविज्ञान अध्ययन संस्थानको खेल मैदानमा एक गोलले पछि परेको अवस्थालाई उल्ट्याउँदै आर्मीले जित हात पारेको हो ।

आर्मीलाई स्ट्राइकर नवयुग श्रेष्ठले खेल सकिन १६ सेकेन्ड बाँकी रहेको अवस्थामा १-१ गोलको बराबरीमा फर्काएका थिए । आर्मी त्यसअघि विदेशी खेलाडी मार्टिन अजाईको गोलमार्फत खेलमा पछि परेको थियो ।

त्यसपछिको बाँकी समयमा दुवै टोलीबाट थप गोल नभएपछि ८० मिनेटको खेल १-१ गोलको बराबरीमै टुंगिएको थियो । त्यसपछि थप गरिएको २० मिनेटको समयमा भने तीन गोल गर्दै आर्मी ४-१ को अन्तरमा विजयी बन्न सफल भयो ।

आर्मीले ९१औं मिनेटबाट अग्रता बनाएको थियो । नवयुगले विपक्षी टोलीका तीन डिफेन्डरलाई छक्याउँदै दिएको बलमा गोल गर्दै भरतले आर्मीलाई अग्रता दिलाएका थिए । त्यसको चार मिनेटपछि भरतको क्रसमा हिरण्य मगरले हेडिङ गोल गरेपछि आर्मी ३-१ ले अघि बढेको थियो । त्यसपछि खेलको एक सय ६ मिनेटमा नवयुगको क्रसलाई गोलमा परिणत गर्दै दीप लामाले आर्मीको जित ४-१ ले पक्का बनाएका थिए ।

जितपछि आर्मीका प्रशिक्षक नवीन न्यौपानेले विपक्षी खेलाडीको फिटनेस निकै कमजोर रहेकाले अतिरिक्त समयमा आफूहरूलाई जितका लागि सजिलो बनेको प्रतिक्रिया दिए । ‘अन्तिम अवस्थासम्म पनि हामीले सम्हालिएर खेल्यौं', प्रशिक्षक न्यौपानेले भने, ‘विपक्षी खेलाडीको फिटनेस ज्यादै कमजोर भएकाले थप समयमा हामी तीन गोल गर्न सफल भयौं ।

विजय युथका प्रशिक्षक सुविन घिमिरेले खेलमा भाग्यले साथ नदिएको बताए । ‘दुर्भाग्य नै लागेको छ कि हामीले पहिलो हाफमा केही सेकेन्ड सम्हालिन नसक्दा गोल बेहोर्न पुग्यांै', उनले भने, ‘अन्ततः हामी त्यसपछि खेलमा फर्कन सकेनौं ।'