हिमपातको मारमा कर्णालीबासी

सिमकोटः शनिबार रातिदेखि परेको हिमपातले कणालीबासीको जनजीवन प्रभावित बन्दै गएको छ । हुम्ला सदरमुकाम सिमकोटमा अहिले एक फिट भन्दा बढी हिउँ जमेको छ ।

हिँउ परेसँगै चिसो पनि बढेको स्थानीयबासीले बताएका छन् । यो वर्ष दोस्रो पटकको हिउँले सिमकोटमा निकै चिसो बढेको सहायक प्रमूख जिल्ला अधिकारी ऋद्धीप्रसाद सिटौलाले बताए । हिउँका कारण स्थानीयबासी घरबाहिर पनि निस्कन नसकेको सिटौलाले बताए ।

लिमीमा ३ इन्च जमेको छ भने एक गाउँदेखि अर्को गाउँ जाने सबै बाटा बन्द भएको लिमि जाङ्ग गाउँका स्थानीय छिमि तामाङ्गले बताए ।

हिउँ परेपछि सिमकोट तापक्रम माइनस १२ डिग्री सेल्सियस पुगेको सिमकोट विमानस्थलले जनाएको छ । हिमपातले जिल्लाको उत्तरी क्षेत्रका लिमी, मुचु, खगालगाउँ, स्याँडा, हेप्क्का र बरगाउँ, सिमकोट लगायतका गाविसहरु बढी प्रभावित भएका छन् ।

चिसोले ट्युसन कक्षा रोकिए

हिमपातले एसएलसीको ट्युशन पढ्दै आएका विद्यार्थीहरु समेत निकै प्रभावित बनेका छन् । बिहान ६ बजेदेखि विभिन्न समुहमा सिमकोटमा ट्युसन पढाउँदै आएका मानसरोवर उच्च माध्यमिक विद्यालयका अंग्रेजी विषयका शिक्षक अमरबहादुर शाहीले हिमपातका कारण आजका कक्षा स्थगित गर्नु परेको बताए ।

हिमपातले चिसो निकै बढेपछि आफू बिहानको ट्युसन पढ्न नगएको मुगुको भिईदेखि सिमकोटमा टयुसन पढ्न आएका खेमराज बुमीले जानकारी दिए । हिउँ पर्न रोकिएपछि आज वेलुकाका कक्षा सूचारु हुने शिक्षक शाहीले बताए ।

जुम्लामा पनि हिमपात

आज बिहान देखि जुम्लामा समेत हिमपात भैरहेको छ । पत्रकार कृष्णमाया उपाध्ययका अनुशार खलङ्गा बजारमा अहिले ३ फिट हिउँ जमेको छ । हमिपातका कारण जुम्लाको तापक्रम समते माइनसमा पुगेको छ । हिउँ परेपछि आज जुम्लाको तापक्रम माइनस २ पुगेको बताइएको छ ।

लामो खडेरी पछि दोस्रो पटक परेको हिउँ मुगुको माथिल्लो क्षेत्रमा समेत परिरहेको छ । मुगु सदरमुकाम गमगढीमा भएका मुगु भिईका मनोज धामीका अनुशार ताल्चा बिमान स्थल देखि माथि अहिलेपनि हिमपात भैरहेको छ भने सदरमुकाम गमगढीमा सामान्य बादल मात्रै लागेको छ ।

उता डोल्पाको माथिल्लो क्षेत्रमा समेत हिमपात शुरु भएको छ । नेपाल पत्रकार महासंघ डोल्पाका अध्यक्ष विष्णुलाल बुढाका अनुशार डोल्पाको उत्तरी क्षेत्रमा भएका साल्दाङ्ग लगायतका दर्जन बढी गाविसमा हिजो राती देखि हिमपात भैरहेको छ । डोल्पा सदरमुकाम दुनैमा हिउँ नपरेपनि चिसो भने अत्याधिक बढेको बुढाले जानकारी दिए ।