काठमाडौं: ग्लोबल आईएमई बैंक दशौं वर्ष पूरा गरी एघार वर्षमा प्रवेश गरेको छ । सोही अवसरमा बैंकले विगत वर्षमा जस्तै विभिन्न कार्यक्रमको आयोजना गरेको छ । दशौं वार्षिकोत्सवका अवसरमा बैंकले पुस २३ गते राजधानीमा वित्तीय साक्षरता बढाउन प्रभातफेरी कार्यक्रम सम्पन्न गरेको छ ।
'बचत गरौं' भन्ने मूल नाराका साथ काठमाडौंमा आयोजना गरिएको प्रभातफेरी कार्यक्रममा उपत्यकामा कार्यरत कर्मचारीहरूको उल्लेख्य सहभागिता थियो । प्रभातफेरी कार्यक्रम कान्तिपथ शाखाबाट सुरु भएर दरवारमार्ग, घन्टाघर, रत्नपार्क, सहिदगेट, न्युरोडगेट, वीर अस्पताल, जमल हुँदै पुनः कान्तिपथ शाखामा पुगेर सकिएको थियो ।
सोही अवसरमा बैंकका अध्यक्ष चन्द्रपसाद ढकालले स्थापनाकालदेखि निरन्तर सेवा पुर्याइरहेका ३२ जना कर्मचारीलाई सम्मान गरेका थिए । बैंकले शुक्रबार बर्न भिक्टिम्स सर्भाइभर्स, नेपालमा आबद्ध आगोलागी पीडित तथा अति प्रज्वलनशील पदार्थबाट जलेर बिरामी परेका बालबालिकालाई ज्याकेट तथा खाद्यन्न वितरण गरेको थियो । वार्षिकोत्सवकै अवसरमा बैंकले पुस २१ गते शान्तिनगरस्थित निःसहाय सेवा सदनमा आश्रय लिइरहेका वृद्धवृद्धालाई खाना खुवाउनुका साथै कम्बल पनि वितरण गरेको थियो ।
यस्तै पुस १८ गते सोमबार रक्तदान तथा निःशुल्क मधुमेह परीक्षण कार्यक्रमको आयोजना गरेको थियो । बैंकले ९१ शाखा, १०३ एटीएम, ६ वटा एक्टेन्सन काउन्टर, ४४ शाखारहित बैंकिङ सेवामार्फत देशभर सेवा पुर्याइरहेको छ ।
प्रतिक्रिया दिनुहोस !
