म्याड्रिड : लियोनल मेसीले फ्री किकमार्फत आकर्षक गोल गरेपछि साविक विजेता बार्सिलोना दोस्रो लेग खेलमा एथलेटिक बिल्बाओलाई ३–१ गोलले हराउँदै कोपा डेल रे फुटबल प्रतियोगिताको कवार्टरफाइनलमा प्रवेश गरेको छ ।
बार्साले बिल्बाओलाई समग्रमा ४–३ गोल अन्तरले पराजित गर्न सफल भयो । बार्सा पहिलो लेगमा भने बिल्बाओसँग २–१ ले पराजित भएको थियो ।
घरेलु मैदानमा बार्सालाई आवश्यक नतिजा दिलाउन स्ट्राइकर लुइस स्वारेज, नेमार र मेसीले गोल गरे । बार्सालाई ३५औं मिनेटमा स्वारेजले १–० ले अघि बढाएका थिए । नेमारको क्रसमा भली सट्मार्फत स्वारेजले गोल गरेका थिए । त्यसपछि नेमारले तीन महिनादेखिको आफ्नो गोलको खडेरी टार्दै ४८औं मिनेटमा पेनाल्टीमार्फत गोल गरे । त्यसको तीन मिनेटपछि सबोरिटले बिल्बाओका लागि गोल गरेपछि बार्सा फेरि दबाबमा परेको थियो ।
तर ७८औं मिनेटमा मेसीले फ्रिकिकमार्फत आकर्षक गोल गरेपछि बार्सा प्रतियोगिताको अन्तिम आठमा पुग्न सफल भयो । मेसीले बार्साका लागि पछिल्लो तीन खेलमा लगातार निर्णायक फ्रिकिक प्रहार गरेका हुन् ।
‘मेसी टोलीका लागि सधैं निर्णायक प्रदर्शन गर्छन्’, बार्साका लागि २६औं फ्रिकिक गोल गरेका मेसीका बारेमा प्रशिक्षक लुइस एनरिकले भने, ‘म उनी अझै धेरै वर्ष हामीसँगै रहून् भन्ने चाहन्छु । उनीभन्दा उत्कृष्ट खेलाडी अरू छैनन् ।’
नेमारले भने ११ खेलपछि टोलीका लागि गोल गरेका हुन् । तीन वर्षअघि बार्सामा आबद्ध भएयता पहिलोपटक लामो समय गोल गर्न नसकेका नेमारले पेनाल्टी प्रहारमै भए पनि गोल गरे । नेमार गत अक्टोबरमा च्याम्पियन्स लिगअन्तर्गत इङ्लिस क्लब म्यानचेस्टर सिटीविरुद्ध गोल गरेयता गोलविहीन बन्दै आएका थिए । यसै खेलबाट नेमार, स्वारेज र मेसीले बार्साका लागि समग्रमा तीन सय गोल कटाएका छन् ।
यी तीन स्ट्राइकरले सँगै खेल्न सुरु गरेयता बार्साका लागि तीन सय दुई गोल गरेका छन् । बार्सा यो सिजन कोपा डेल रेको लगातार तेस्रो र समग्रमा २८औं उपाधिको तयारीमा छ । रियल सोसिएडाड, आल्भेस र दोस्रो डिभिजनको अल्कोर्कोन पनि प्रतियोगिताको क्वार्टरफाइनलमा पुगेका छन् । एजेन्सी
प्रतिक्रिया दिनुहोस !
