फुटबल खेलाडीका रूपमा करियर सुरु गरेकी रूपा आङबुङले ६ वर्ष खेलजीवन बिताइन् । पूर्वाञ्चल क्षेत्रीय गेमसम्म खेलेकी उनी अहिले मोडलिङ गर्दै पहिरन व्यवसायमा लागेकी छन् । पछ्यौरी ल्यासिरा, ताप्लेजुङको तोङ्वा सुकुटी, पाङधे लेमेल्ले (गाउँघर छोड्दा) लगायत दर्जनभन्दा बढी म्युजिक भिडियोमा मोडलिङ गरिसकेकी उनी ताप्लेजुङको हाङपाङमा जन्मेकी हुन् । हाल स्नातकोत्तर गर्दै गरेकी उनी फुटबल खेलाडी हुँदा आफ्नो क्षेत्रमा लोकप्रिय थिइन् । ‘नचिन्ने कोही थिएनन् । महिला फुटबलको टिम त्यो पनि गाउँमा । हाम्रो खेल हेर्न दर्शक त कति हन्थे कति’, उनले स्मरण गरिन् । रूपाको खेल एवं मोडलिङ यात्राका बारेमा भएको कुराकानीः
मोडलिङमा कसरी आकर्षित हुनुभयो ?
२०६७ सालमा पहिलो पटक गीता पालुङ्वाको एकल एल्बम ‘हाङनेइन्ले’ (पर्खाइमा)मा समेटिएको गीतको भिडियोमा मोडलिङ गर्ने अवसर पाएँ । योजना बनाएरभन्दा पनि अनायसै म यस क्षेत्रमा आएकी हुँ ।
जति मेहनत र समय दिनुभएको छ प्रतिफल कस्तो लाग्छ ?
बढी समय दिनुभन्दा पनि प्राप्त अवसरलाई सदुपयोग गरेकी हुँ । थोरै काम गरे पनि धेरैले चिन्छन् । खुसी लाग्छ ।
के कुराले तपाईंलाई मोडलिङप्रति आकर्षित गर्छ ?
मोडलिङ रहरमात्रै भए पनि समुदायका लागि केही गर्न प्लेटफर्म बनेको छ । मैले आफ्नो भाषा र संस्कृतिसँग सम्बन्धित धेरै भिडियो गरेकी छु । यसले मलाई खुसी र सन्तुटि पनि दिएको छ ।
यो क्षेत्रमा भविष्य छैन भनिन्छ ?
भविष्य सम्झेर यो क्षेत्रमा लागेको होइन, अवसरको सदुपयोगमात्रै हो ।
खेलाडी र मोडलिङ जीवन कुन रमाइलो ?
त्यो बेला फुटबल सर्वस्वजस्तो लाग्थ्यो । अहिले मोडलिङ रमाइलो लाग्छ । दुवै क्षेत्र उत्तिकै महत्वपूर्ण लाग्छ ।
परिहन व्यवसाय पनि सुरु गर्नुभयो ?
यसलाई चाहिँ निरन्तरता दिने हो । पहिरन व्यवसाय पनि मेरो रुचिको क्षेत्र हो ।
फेसन डिजाइनतिर लाग्ने सोच छ ?
म फेसन डिजाइनर नभए पनि धेरै कन्सेप्टलाई उतारेको छु । यस क्षेत्रमा थप अध्ययन गर्ने सोच पनि छ ।
भविष्यको योजना ?
सफल व्यवसायी बन्ने र त्यसको केही प्रतिशत समाजसेवामा लगाउने मेरो लक्ष्य छ । खुड्किलो नेपाल र हिलिहाङ हाक्पारे पालाम सयङमार्फत अहिले पनि समाज र समुदायको सेवामा लागिरहेकै छु । अहिले अर्को नयाँ व्यवसाय पनि सुरु गर्ने तयारीमा छु ।
प्रतिक्रिया दिनुहोस !
