जाडोमा फेसन
जाडो मौसम धेरैलाई मन पर्छ । तर फेसनप्रेमीका लागि यो मौसम त्यति ‘फ्रेण्ड्ली’ मानिँदैन । चिसोबाट जोगिन पनि गाह्रो हुन्छ । तापनि केही सेलिब्रेटी फेसनेबल देखिन मौसमलाई पनि सदुपयोग गर्ने गर्छन् । केही अभिनेत्रीले जाडोमा फेसन गर्ने तरिकाका बारेमा विनिता मरहट्टासँग कुरा गरेका छन्ः
जाडोको फेसन रमाइलो
महिमा सिलवाल
जाडोमा स्वास्थ्य र फेसन दुवैलाई ध्यान दिन अलि गाह्रो हुन्छ । मलाई चिसोको एलर्जी छ । सोमा जाँदा पनि ज्याकेट लिएर कसैलाई स्ट्यान्डबाई राख्नुपर्छ । जाडोका लुगामा फेसन गर्न रमाइलो हुन्छ । ऊनीका लुगा लगाउँछु । उज्यालो रङ बढी मन पर्छ ।
स्कुटर चलाउनुपर्दा कालो रङको ज्याकेट लगाउँछु । आफूलाई सुहाउँदो र सजिला लुगा लगाउँछु । शरीरलाई पानीको मात्रा पुर्याउन तातो पानी, हट लेमन विथ हनी, ग्रिन टी पिउँछु । शरीरलाई जाडोबाट बचाउनुका साथै फिट पनि राख्नुपर्छ । जाडोमा छालाको स्याहारका लागि कोल्ड क्रिम लगाउँछु ।
केटीहरूलाई गर्मी प्यारो
सुरजनी केसी
तातो लुगा लगाउनु र फिट रहनु जाडोमा महत्वपूर्ण काम हुन् । फेसनेबल देखिनैपर्छ । लङ कोट, स्टकिङ, बुट मेरो रोजाइमा पर्छन् । ऊनीको लुगा मन पर्छ । क्यामेरा फेस गर्दाचाहिँ ऊनीको लुगा लगाउँदिनँ । यसले मोटी देखिन्छ । अरू टाइपको लुगा लगाउँछु ।
डार्क रङका लुगा बढी लगाउँछु । त्यसबाहेक सेतो र क्रिम कलर पनि रोजाइमा पर्छन् । बाइक चढ्दा अलि समस्या हुने हो, गाडीमा हिँड्दा त्यति धेरै जाडो महसुस हुँदैन । पहिरन हेरेर मफलर पनि प्रयोग गर्छु । केटीहरूलाई जाडोभन्दा गर्मी नै मन पर्छ ।
सजिलो र न्यानो
आयुष्मा कार्की
यो वर्षको चिसो अलि फरक भयो । स्नातकोत्तरको परीक्षा भएकाले बाहिर त्यति निस्किएको छैन । सुटिङ पनि छैन । कहिलेकाहीँ निस्कँदा लङ ड्रेस लगाउन मन पर्छ । जाडो भन्नेबित्तिकै भद्दा लुगा भनेर बुझ्नु हुँदैन । आफूलाई सजिलो लाग्ने र न्यानो हुने पहिरनमा फेसनेबल देखिन सकिन्छ । फिटिङ लुगा लगाउन मन पराउँछु ।
अरू बेलामा पनि प्रायः फुल लुगा नै लगाउँछु । लामो कोटमा एक्स्ट्रा कलर, डिजाइन भएको मन पर्छ । यस्तो कोटमा थोरै हिल भएको बुट लगाउँदा राम्रो देखिन्छ । कुनैकुनै बेला जाडोका लुगा क्यारी गर्न गाह्रो हुुन्छ । तर, लुगा किन्ने बेलामा सफ्ट र हलुका खालको हेर्नुपर्छ ।
बुटमा डाउन ज्याकेट
आशा भुसाल
जाडोमा फेसन गर्न झन् धेरै अप्सन हुन्छ । कस्तो ठाउँ, कस्तो ड्रेस लगाउने त्यसमा भर पर्छ । तर जस्तो पायो त्यस्तै लगान हुन्न । समय र परिस्थिती अनुसार मिलाएर लगाउनुपर्छ ।
कुन कलरमा कुन कम्बिनेसन राम्रो देखिन्छ ध्यान दिनुपर्छ । कहिले कलरफुल त कहिले ब्ल्याक लुगा लगाउँछु । बुटमा डाउन ज्याकेट राम्रो अप्सन हो । स्टकिङ र ड्रेसले पनि ट्रेन्डी लुक देखाउँछ । लुगासँगै आफ्नो छलालाई जाडोबाट जोगाउन मोस्चराइजर प्रयोग गर्छु ।
मफलरभन्दा हाइनेक
जेविका कार्की
फेसनभन्दा अगाडि स्वास्थ्य हो । आफूलाई ट्रेन्डी वेमा न्यानो राख्नुपर्छ । बुट र कोट लगाउँदा राम्रो देखिन्छ । ऊनीका लुगा, भित्र भुवा भएका लुगा बढी मन पर्छ । जाडोका लुगामा खरानी, कालो र कलेजी रङ बढी रोजाइमा पर्छन् ।
मफलर लगाउनुभन्दा हाइनेक लुगा लगाउन मन पर्छ । स्वेटर, डाउन ज्याकेट लगाउन सजिलो लाग्छ । डाउन ज्याकेटको फाइदा छ । यो लगाएपछि भित्र धेरै लुगा लगाउनु पर्दैन । हावाबाट पनि जोगाउँछ । हातमा औंठी र घाँटीमा सधैं प्रयोग गर्ने सिक्रीबाहेक अरु एसेसोरिज लगाउँदिनँ । पहिरनबाटै फेसनेबल देखिन्छु । तातो हुन चिया कफी बढी पिउँछु ।
जाडोमा हट कलर
क्षितिजा शाक्य
क्याजुअलमा साधारण लुगा लगाउँछु । फिटिङ लगाउन सक्दिनँ । लुज खालको जुटको लुगा लगाउँछु । पार्टी वेयरमा भेलभेट, उलनका लुगा बढी प्रयोग हुन्छ । भित्रपट्टि हाइनेक लगाएर पार्टी वेयर लगाउँदा राम्रो देखिन्छ । सारीमाथि सटकोट, लङकोट बढी चलनमा छ । ग्ल्यामर क्षेत्रमा भएकाले फुल स्लिभमा डिजाइनर लुगा लगाउँछु । फुट वेयरमा लङ बुट चलेको छ ।
छोटो बुट लगाउँदा लेग वार्मर लगाउनु राम्रो हुन्छ । नेक ओपन भएको लुगामा मफलर लगाउँछु । वुलन टोपी पनि फेसनमा छ । डार्क ब्लु, ब्ल्याक, अरेन्ज कलर प्रयोग गर्न सकिन्छ । हट रेड एकदम राम्रो रोजाइ हुन्छ । हट कलर जति जाडोमा प्रयोग गर्नुपर्छ । मेकअपमा पनि त्यत्तिकै ध्यान दिनुपर्छ ।
प्रतिक्रिया दिनुहोस !
