दुर्घटनामा उद्योगीको मृत्य भएपछि तीन घण्टा राजमार्ग अवरुद्ध

विराटनगर : शुक्रबार दिउँसो विराटनगरमा भएको दुर्घटनामा उद्योगीको मृत्यु भएपछि तीन घण्टा राजमार्ग अवरुद्ध भएको छ। भृकुटीचौकमा काजला कपि उद्योगका संचालक विराटनगर ९ का ३५ वर्षीय मनिष दुगडको दुर्घटनामा मृत्यु भएपछि राजमार्ग अवरुद्ध भएको हो।

को २१ प ५६८१ नम्बरको मोटरसाइकलमा सवार दुगडको घटनास्थलमै मृत्यु भएको प्रहरीले जनाएको छ । दुर्घटनामा हेल्मेट फुटेर दुगडको टाउको समेत क्षतविक्षत भएको छ ।

दुर्घटना गराउने सवारी साधनको पहिचान गर्न समस्या भएको मोरङ प्रहरी प्रमुख एसपी सन्दीप भण्डारीले जानकारी दिए । उनका अनुसार दुर्घटना भएका बखत मोटरसाइकल जाँदै गरेको दिशाबाट को १ त ६५८४ नम्बरको ट्याक्टर र विपरित दिशाबाट बा १ ग १८७३ नम्बरको सशस्त्र प्रहरीको गाडी आउँदै थियो ।

एसपी भण्डारीले दुवै सवारी साधन र चालकलाई नियन्त्रणमा लिएर दुर्घटनाबारे अनुसन्धान भइरहेको जानकारी दिए । मृतक आफन्तले प्रहरीको गाडीले ठक्कर दिएर दुर्घटना भएको आरोप लगाएका छन् । यता, प्रत्यक्षदर्शीहरुबाट फरकफरक भनाइ आएपछि अनुसन्धान जटिल बनेको प्रहरीले बताएको छ।

घटनापछि आक्रोसित आफन्त र स्थानीय बासिन्दाले कोसी राजमार्ग अन्तर्गत विराटनगरको भृकुटीचौकमा तीन घण्टा सवारी साधन संचालनमा रोक लगाएका थिए । एक बजे भएको दुर्घटनापछि बन्द भएको सडक दिउँसो साढे ४ बजेबाट भने खुलेको छ।