काठमाडौं: नेपाल एग्रो माइक्रोफाइनान्स वित्तीय संस्थाको प्रथम वार्षिक साधारणसभा शुक्रबार सम्पन्न भएको छ । वित्तीय संस्थाका अध्यक्ष रमेशकुमार कर्माचार्यको अध्यक्षतामा सम्पन्न साधारणसभाले १ बराबर १ को अनुपातमा हकप्रद सेयर जारी गरी सेयर पुँजी चार करोड र चुक्ता पुँजी दुई करोड ८० लाख पुर्याउने निर्णय गरेको छ ।
सभाले रमेशकुमार कर्माचार्य, निलकण्ठ शर्मा लम्साल, विनीता कोइराला, सिए विवेक श्रेष्ठ र सरिता अधिकारीलाई चार वर्षका लागि सञ्चालकमा चयन गरेको प्रमुख कार्यकारी अधिकृत तेजेन्द्र शर्मा लम्सालले बताए । नेपाल एग्रो माइक्रोफाइनान्सका अध्यक्ष रमेशकुमार कर्माचार्यले प्रचलित कानुनअन्तर्गत सदस्यको चाहना र आवश्यकताअनुसार कर्जा, बचत तथा अन्य सेवालाई विस्तार गर्ने बताए ।
उनले दीर्घकालसम्म सहयोगी संस्थाका रूपमा रहने गरी कृषि क्षेत्रको विकास एवं विभिन्न सचेतनामूलक कार्यक्रम गर्ने, मुनाफासँगै सेवालाई प्राथमिकतामा राखी कार्य गर्ने बताए । संस्थाले एक वर्षमा ११ वटा शाखा विस्तार गरिसेकेको छ । संस्थाले दुई हजार नौ सय ग्राहक सदस्यबाट ७२ लाखभन्दा बढी बचत संकलन गरेको र आठ करोडभन्दा बढी लगानी गरिसकेको छ ।
प्रतिक्रिया दिनुहोस !
