बुखारेस्ट (रोमानिया) : पूर्वी युरोपभरी ठूलो परिमाणमा हिमपात हुँदा त्यहाँका बासिन्दाको दैनिक जीवन कष्टकर हुँदै गइरहेको छ । बाक्लो कम्बल ओछ्याए सरहको हिमपातले त्यहाँका बासिन्दाले निकै कष्ट भोग्नुपरेको छ ।
अति कठ्यांग्रिने गरी बढेको ठण्डीका कारण बस, रेलजस्ता साधनहरू ठप्प भइदिनाले यात्रामा ज्यादै कठिनाइ र विलम्ब, ठाउँ ठाउँमा विद्युत् आपूर्ति बन्द, शून्य डिग्रीभन्दा धेरै तलको तापक्रमले हजारौं मानिस चिन्तित भएका छन् । यस वर्षको कडा ठण्डी युरोपभर फैलिँदा कम्तीमा ७३ जनाको ज्यान लिइसकेको छ । ठण्डीकै कारण पोल्यान्डमा सयौं मानिस हिउँमा फसेका छन् । लाखौं आप्रवासीहरूको बिजोग छ । ग्रिसमा करिब ७० हजार आप्रवासी हिउँमा फसेका छन्। तिनको बस्ने ठाउँ छैन ।
त्यस्तै बिहानैदेखि रोमानियामा सुरु भएको हिमपात, खपिनसक्नुको जाडो र चीसो हावाका कारण गन्तव्यतर्फ जाने सडक यातायात ठप्प भएका छन् भने रेलहरू राम्ररी चल्न नसक्दा सबैतिर ज्यादै विलम्ब भएको छ । शीघ्र यातायात सेवा, मध्यम तथा लामो दूरीका हजारौं बस तथा मिनीबसहरू यातायात सञ्चालन गर्न नसकी सुरुङमार्गमा आ श्रय लिई रोकिरहन बाध्य छन् । सडकभरी तथा यत्रतत्र हिउँ जमेकाले स्कीका सौखिनहरू कतैकतै बडो रमाएर खेलिरहेका पनि देखिन्छन् ।
सर्बियामा पनि ठण्डीले छ जनाको ज्यान लिएको छ । त्यहाँका सरकारी अधिकारीहरूले भारी हिमपात भइरहेका क्षेत्रका बस्तीबाट १३० जनालाई उद्धार गरी अन्तै लगेका छन् । बाटोघाटोको हिउँमा फसेका यात्रुहरूको उद्धार गर्न विशेष प्रकारका दर्जनौं गाडी परिचालन गरिएको छ । हिमपातबाट नराम्ररी प्रभावित रोमानिया र सर्बियाका सबै स्थानका विद्यालय अनिश्चित कालका लागि बन्दसमेत गरिएका छन् ।
अफ्रिकाको बाटो हुँदै युरोप छिर्ने क्रममा मानव तस्करी गर्नेहरूले बीच बाटोमै छोडिदिएपछि केहि आप्रवासी मृत अवस्थामा भेटिएका छन् । ग्रिसको टापुहरूमा बस्ने मध्ये १५ हजारभन्द्या बढी मानिसको अवस्था गम्भीर छ । बाल्कन क्षेत्रमै सन् १९६३ पछि यो महिना सबैभन्दा बढी ठण्डी भएको छ ।
प्रतिक्रिया दिनुहोस !
