भद्रपुरः सामान्य प्रशासनमन्त्री केशवकुमार बुढाथोकीले मुलुकको राजनीतिक परिवर्तनसँगै प्रशासनको पनि पुनःसंरचना आवश्यक रहेको बताएका छन् ।
प्रधानमन्त्री तथा मन्त्रिपरिषद्को कार्यालयको आयोजनामा सोमबार झापाको जिविस हलमा आयोजित संविधान कार्यान्वयन तथा प्रशासन पुनःसंरचनाका सम्बन्धमा सरोकारवालासँग गरिएको अन्तरक्रिया कार्यक्रमको उद्घाटन गर्दै उनले प्रशासनमा सुधार आवश्यक भएको बताएका हुन् ।
उनले सिंहदरबारको अधिकारलाई स्थानीय तहसम्म पुर्याउन सकेमा मात्र स्थानीय तहबाट जनता अपेक्षित लाभान्वित हुने भन्दै निजामती कर्मचारीले पनि आफ्ना दृष्टिकोणलाई फराकिलो पार्न आग्रह गरे ।
कर्मचारीको व्यवहारबाट नै मुलुकको आर्थिक सामाजिक र राजनीतिक क्षेत्रको विकास हुने मन्त्री बुढाथोकीको भनाइ थियो । सरकारले कर्मचारीको लागि स्वास्थ्य बिमा र निवृत्तकोष स्थापना गर्न आवश्यक छलफल गरिरहेको मन्त्री बुढाथोकीले बताए ।
कार्यक्रममा प्रधानमन्त्री तथा मन्त्रिपरिषद् सचिवालयका सचिव दिनेशकुमार थपलियाले संविधानको सफल कार्यान्वयनमा राजनीतिक संरचना, प्रशासनिक पुनःसंरचना र वित्तीय व्यवस्थापन हुनुपर्ने कुरामा जोड दिए ।
प्रधानमन्त्री तथा मन्त्रिपरिषद् कार्यालयका सहसचिव डिल्लीराम शर्माले संविधानको कार्यान्वयन र प्रशासनको पुनःसंरचनाका विषयमा कार्यपत्र प्रस्तुत गरेका थिए ।
कार्यक्रममा जिल्लाका सबै सरकारी कार्यालयका प्रमुख, राजनीतिक दलका प्रतिनिधिको सहभागिता थियो । रासस
प्रतिक्रिया दिनुहोस !
