रामोसको आत्मघाती गोलले डुबायो रियल म्याड्रिडलार्इ
म्याड्रिडः खेलको अन्त्यतिर सर्जियो रामोसबाट आत्मघाती गोल भएपछि रियल म्याड्रिड स्पेनिस ला लिगा फुटबलको आइतबार राति सम्पन्न खेलमा सेभिलसँग २-१ गोलले पराजित भएको छ । उक्त हारसँगै रियलको अपराजित यात्रा पनि टुंगिएको छ ।
यसअघि रियलले लगातार ४० खेलमा अपराजित रहँदै स्पेनिस फुटबलमा कीर्तिमान बनाएको थियो । रियलले अघिल्लो साता आफ्नो चिर प्रतिद्वन्द्वी बार्सिलोनाले बनाएको ३९ खेलको अपराजित यात्रा तोडेको थियो ।
हारसँगै रियलले ला लिगा तालिकामा अग्रता फराकिलो बनाउने अवसर पनि गुमाएको छ । यद्यपि १७ खेल खेलेको रियल ४० अंकसहित तालिकाको पहिलो स्थानमै आसीन छ । दोस्रो स्थानमा रहेको सेभिलले १८ खेलबाट ३९ र तेस्रो स्थानमा रहेको बार्सिलोनाले १८ खेलबाट ३८ अंक जोडेका छन् । सेभिलको मैदानमा खेलिएको उक्त खेलमा सुरुआती अग्रता बनाएको रियलले अन्तिम समयमा आएर दुई गोल खाएको थियो ।
पहिलो हाफ गोलरहित बराबरीमा सकिएको उक्त खेलको ६७औं मिनेटमा पोर्चुगिज खेलाडी क्रिस्टियानो रोनाल्डोले पेनाल्टीमा गोल गर्दै रियललाई अग्रता दिलाएका थिए । डानी कार्भाजललाई डीबक्सभित्र सेभिलका गोलरक्षक सर्जियो रिकोले फल गरेपछि रियलले पेनाल्टी प्रहारको अवसर पाएको थियो ।
८५औं मिनेटमा रामोसबाट आत्मघाती गोल भएपछि खेल १-१ को बराबरीमा पुगेको थियो । सेभिलमै जन्मिएका ३० वर्षीय रामोसबाट बल क्लियर गर्ने क्रममा हेडमार्फत आत्मघाती गोल भएको थियो । ‘सेभिलमा मैले उत्कृष्ट फुटबल खेलेँ । त्यो आत्मघाती गोल सामान्य रूपमा भएको हो, त्यसमा मेरो कुनै दोष थिएन’, खेलपछि रामोसले भने ।
खेलको इन्जुरी समयमा सेभिलका स्टिभन जोभेट्किले गोल गरेपछि रियल हार स्वीकार्न बाध्य भयो । गत अप्रिलमा च्याम्पियन्स लिगको क्वार्टरफाइनलको पहिलो लेग खेलमा जर्मन क्लब उल्फ्सबर्गसँग २-० गोलले पराजित भएयता रियलले एक खेल पनि हारेको थिएन ।
‘हामीले सेभिलविरुद्घ स्तरीय प्रदर्शन गर्यौं, हामीसँग अझै पाँच मिनेट समय भएको भए नतिजा फरक आउन सक्थ्यो’, खेलपछि रियलका प्रशिक्षक जिनेदिन जिदानले भने । करिब एक वर्षअघि रियलको प्रमुख प्रशिक्षकको जिम्मेवारी लिएयता जिदानले केवल तीन खेलमा पराजय भोगेका छन् ।
दुई साताअघि खेलिएको कोपा डेल रे फुटबलको अन्तिम १६ टोलीबीचको भिडन्तको पहिलो लेग खेलमा रियलले सेभिललाई ३-० गोलले हराएको थियो । जारी सिजनको लिगमा सेभिलले हात पारेको यो लगातार चौथो जित हो । सेभिलले सन् १९४६ देखि स्पेनिस लिगको उपाधि जित्न सकेको छैन ।
‘यो हाम्रा लागि निकै ठूलो सफलता हो । रियललाई हराएपछि हाम्रा खेलाडीको मनोबल उच्च भएको छ र आगामी खेलमा पनि यसले हाम्रो उत्साह बढाउने निश्चित छ’, सेभिलका प्रशिक्षक जोर्गे साम्पाओली भन्छन् ।
यसअघि रियलले खेलेका नौमध्ये आठ खेलमा जित हात पारेको थियो । बार्सिलोनाविरुद्घको खेलमा भने रियल १-१ गोलको बराबरीमा रोकिएको थियो । त्यति बेला रामोसले नै रियलका लागि अन्तिम समयमा जवाफी गोल गरेका थिए । बार्सिलोनाले भने शनिबार राति भएको आफ्नो पछिल्लो लिग खेलमा तुलनात्मक रूपमा कमजोर प्रतिद्वन्द्वी लस पाल्मसलाई ५-० गोलको फराकिलो अन्तरले हराएको थियो ।
प्रतिक्रिया दिनुहोस !
