माघी मेलामा लाठीचार्ज : पाँच व्यापारी पक्राउ
बर्दिया : बर्दियाका पर्यटकीय नगरी ठाकुरद्वारास्थित ठाकुरबाबा मन्दिर परिसरमा लगाइएको माघी मेलामा प्रहरीले लाठीचार्ज गरेको छ ।
मेलामा स्टल राखेका स्थानीय व्यापारीलाई प्रहरीले कुटपिट गरेपछि आक्रोशित व्यवसायीको भिडलाई नियन्त्रणमा लिन प्रहरीले मेलामा लाठीचार्ज गरेको हो ।
प्रहरीको लाठीचार्जबाट दुर्गा टेन्ट हाउसका संचालक दुर्गा जैसी घाइते भएका छन् । एकजना पत्रकारले प्रहरीले मेलामा पैसा असुली गरेको सम्बन्धी प्रतिकृया लिएपछि आक्रोशित प्रहरीले पत्रकार खोज्ने क्रममा व्यापारी माथि कुटपिट गरेको स्थानियको आरोप छ ।
प्रहरीले राति अन्धाधुन्धा हवाईफायर गर्दै लाठीचार्ज गरेको स्थानियले बताएका छन् । एक सातासम्म चल्ने स्थानीय माघी मेला प्रहरीले लाठीचार्ज गरेपछि स्थगन भएको हो ।
मेलाबाट ५ जनालाई नियन्त्रणमा लिएको प्रहरी उपरीक्षक राजेन्द्र खड्काले बताए । घटनाको विषयमा अनुसन्धान भइरहेको उपरीक्षक खड्काको भनाइ छ ।
प्रतिक्रिया दिनुहोस !
