विद्युत प्राधिकरणको बेवास्ताले सदरमुकाम जोखिममा

भोजपुर: सदरमुकाममा बिजुलीका तार यत्रतत्र लत्रिएका छन् । कुनै पोल भाँचिएका । कुनै मक्किएका । पोलमा तारको भार छ । पानीट्याङ्की स्थित भोजपुर-लेगुवा मुख्य सडक खण्डमा पर्ने बस टिकट काउण्टर छेउमा फलामे साईन बोर्ड माथि विजुली तारको चाङ छ । सदरमुकामभरमा पुग्ने मेन लाइनको तार चुट्टिने अवस्थामा लत्रिएको छ ।

चारभञ्ज्याङ, बीचबजार, बैकरोड, गेटरोड लगायतका मुख्य चोक र बस्तीमा गाडिएका पोल र टाँगिएका तारको हबिगत उस्तै छ । पोल ढलेर कतिबेला तार जुध्ने हो ? कस्तो जोखिम आइपर्ने हो ? टुगों छैन । बर्षौ गाडिएका फालामे पोल खिया लागेर छियाछिया भएका छन् । एउटै पोलबाट धेरै सेवाग्रहीलाई जोडिदिएका तारलाइन एकैठाँउ जोल्ठिएका छन् । कुन उपभोक्ताको लाइन हो, विधुत प्राधिकरण आफैले तत्कालै छुट्याउन सक्दैनन् । भुकम्प, आगलागी जस्ता दैवी विपत्तीमा जोखिम बढेको छ । अचानक बिजुली सर्ट हुँदा बजारनै ध्वस्त हुने अवस्था छ । ५ हजार ८ सय सेवाग्राहीले एकैचाटी जोखिम मोल्नुपर्ने स्थिती छ ।

हावाहुरीको मौसम सुरु भैसकेकाले जोखिम झन् बढेको छ । 'हावाले पोल ढालेर विजुली शर्ट हुने, आग्लागी हुने सम्भावना एकदमै बढि छ, कतिबेला कस्तो दुर्घटना आइलाग्ने हो थाहा छैन', देउरालीका सेवाग्राही भीम इशासा राईले भने । प्राधिकरणलाई व्यवस्थापनका लागी पटक पटक आग्रह गरेपनि बर्षौदेखी जस्ताकातस्तै रहेको उनले बताए । 'चाडै व्यवस्थापन गर्छु भन्न छाड्दैन, काम गरेर कहिले देखाउदैन,' स्थानीय पवित्रा राईले बताइन् ।

पटक पटकको आग्रह गर्दासमेत प्राधिकरणको अटेरिपनले सेवाग्राही जोखिममा छन् । ढुवानी र यातायातका साधन ओहोरदोहोर गर्न समस्या छ । पोलहरु अपायक ठाँउमा गाडिदाँ सर्वसाधारणले तार छलेर यात्रा गर्नुपर्ने समस्या छ । कतिपय मुलबाटो र चोकमा आवतजावत गर्नेको भीडमा पर्दा र सडक जाम हुदा बाटो काट्न हम्मे पर्ने बैंकरोडका ज्योती पौडेलले बताए ।

विजुलीतारबाट जोगिनकै लागि ग्राहक परपरै जोगिदै हिड्दा व्यापारीलाई व्यापार गर्न समस्या भैसकेको छ । 'बाटोमा हिँड्नेहरु डराउँदै बाटो देखि परपरबाट जोगिँदै हिँड्छन्, हामी दोकान थाप्नेहरुलाई ग्राहक नआउलान् कि भन्ने डर छ,' एक व्यापारीले भने । यसरी त्रासको अवस्थामा पनि प्राधिकरणको व्यवास्ताले उनीहरु चुपचाप समस्यासंग जुधिरहेका छन् ।

सदरमुकामको विभिन्न चोकहरुका २५ बढि पोल खिइएको, ढल्न लागेको, लत्रिएको अवस्था छन् । प्राधिकरणले कर्मचारी अभावले गर्दा चाहेर पनि व्यवस्थापन गर्न ढिलाई भएको बताउँछ । 'भएका कर्मचारीले समेत काम गर्ने इच्छा देखाउदैनन्, कर्मचारीतन्त्र हावी हुदा सेवाग्राहीका गुनासा सुनेरै पठाउछन्,' नागरिक समाजका संयोजक पर्शराम तिवारीले आरोप लाए ।

सहरको अवधारण विना बर्षौ अघि गाडिएका पोल, टाँगिएका तार पालैपालो रिप्लेस गर्दै आएको विधुत प्राधिकरण वितरण शाखाका प्रमुख खगेन्द्रवहादुर भण्डारीले बताए । कतिपय ठाँउमा वैकल्पिक व्यवस्थापन गर्न सेवाग्राही नै नमानेकाले पोल र तार व्यवस्थापनमा कठिनाइ भएको जनाए । यद्यपी विधुतको अस्तव्यस्तता बारे प्रमुख भण्डारी सकरात्मक छैनन् । 'हामीले कर्मचारी अभावका बाबजुत पनि सेवाग्रहीलाई सेवा दिन चुकेका छैनौ,' उनले भने ।