काठमाडौः नेपाल बैंक लिमिटेडले २३ दशमलव ७४ कित्ता हकप्रद सेयर निष्कासन गर्ने भएको छ । बैंकको ५६ औं वार्षिक साधारणसभाबाट पारित भएबमोजिम बैंकले आफ्ना सेयरधनीलाई १० बराबर २.३७४ अर्थात् १०० कित्ता सेयर बराबर २३ दशमलव ७४ कित्ता हकप्रद सेयर निष्कासन गर्ने भएको हो ।
उक्त हकप्रद सेयर निष्कासनका लागि बैंकले सिभिल क्यापिटल मार्केट लिमिटेडलाई हकप्रद सेयर निष्कासन बिक्री प्रबन्धकमा नियुक्त गरेको छ । बुधबार बैंक र क्यापिटल मार्केटबीच उक्त सम्झौता भएको हो ।
सम्झौतामा बैंकको तर्फबाट प्रमुख कार्यकारी अधिकृत देवेन्द्रप्रताप शाह तथा सिभिल क्यापिटल मार्केट लिमिटेडको तर्फबाट प्रमुख कार्यकारी अधिकृत पराग बिष्टले हस्ताक्षर गरेका छन् । नेपाल बैंक लिमिटेडले प्रतिसेयर सय रुपैयाँका दरले एक करोड ५४ लाख ३१ हजार आठ सय ४० कित्ता हकप्रद सेयर निष्कासन गर्न लागेको हो ।
हाल बैंकको चुक्ता पुँजी ६ अर्ब ५० करोड रहेको छ भने हकप्रद सेयर निष्कासनपश्चात बैंकको कुल चुक्ता पुँजी आठ अर्ब चार करोड हुने बैंकले जनाएको छ । हाल चुक्ता पुँजीको ६२.२१ प्रतिशत सेयर स्वामित्व नेपाल सरकारको छ भने बाँकी बैंक कर्मचारी तथा सर्वसाधारणको रहेको छ । बैंकले एक सय ३० वटा शाखामार्फत आधुनिक बैंकिङ सेवा प्रदान गर्दै आएको छ ।
प्रतिक्रिया दिनुहोस !
