काठमाडौः क्यान महासंघको आयोजनामा यही माघ १३ गतेदेखि ‘सुविसु क्यान इन्फोटेक २०१७ इन एसोसिएसन विथ सामसुङ’ आयोजना हुने भएको छ ।
मेला माघ १३ गतेदेखि १८ गतेसम्म काठमाडौं भृकुटीमण्डपस्थित प्रदर्शनी हलमा आयोजना हुनेछ । ६ दिनसम्म सञ्चालन हुने यस मेलामा विश्वमा सूचना तथा सञ्चार प्रविधि क्षेत्रमा भएका विकास तथा नयाँ प्रविधिका बारेमा जानकारी प्रदान गरिने आयोजकले जनाएको छ ।
राष्ट्रिय तथा अन्तर्राष्ट्रिय सूचना तथा सञ्चार प्रविधिसम्बन्धित कम्पनीको सहभागितामा मेलाले नेपाली सूचना प्रविधि क्षेत्रको विकासमा सहयोग पुर्याउने अपेक्षा गरिएको क्यान महासंघका अध्यक्ष विनोद ढकाल बताउँछन् ।
उनकाअनुसार मेलाले व्यवसायीलाई व्यापारिक सम्भावना विस्तारित गर्ने मात्र नभई नौलो प्रविधिको प्रदर्शनी गर्ने मौकासमेत प्रदान गर्नेछ । साथै अवलोकनकर्ताले एकै थलोमा सूचना तथा सञ्चार प्रविधिका नयाँ उपकरणको अवलोकन तथा खरिद गर्न पाउनेछन् ।
मेलामा मुख्य प्रदर्शनी हलभित्र ४९ ठूला र हलबाहिर ५ वटा ब्रान्डिङ प्रदर्शनी कक्ष, ट्रसमा एक सय ४४, ओपन स्पेस १४ र फुड स्टल १० गरी जम्मा दुई सय २२ स्टलमा हार्डवेयर, सेल्स तथा मेन्टिनेन्स, पावर सोलुसन्स, मोबाइल एसेसरिज, डिलर र डिस्ट्रिब्युटर्स, इन्टरनेट सेवा प्रदायक, टेलिकम्युनिकेसनका स्टल रहनेछन् ।
नेपालको सूचना तथा सञ्चार प्रविधि क्षेत्रको विकास, विस्तार र प्रवद्र्धन गर्न आवश्यक रणनीतिसहित सार्थक अन्तर्त्रिया गर्ने उद्देश्यले माघ १६ र १७ गते सुविसु क्यान आईसीटी कन्फरेन्स २०१७ आयोजना हुने आयोजकले जनाएको छ । कन्फरेन्स सोल्टी क्राउन प्लाजामा हुनेछ ।
प्रतिक्रिया दिनुहोस !
