काठमाडौं: अन्तर्राष्ट्रिय प्रहरी संगठन (इन्टरपोल) को २३ औं एसिया क्षेत्रीय सम्मेलनको दोस्रो दिन बिहीबार भारत, चीन, बंगलादेश, बहराइनलगायत २५ वटा राष्ट्रले कार्यपत्र प्रस्तुत गरेका छन् ।
विशेषगरी साइबर अपराध, बैंक ठगी, म्याच फिक्सिङ, लागूपदार्थ ओसारपसार र संगठित अपराधको विषयलाई लिएर इन्टरपोलका कन्ट्री डाइरेक्टरहरूले कार्यपत्र पेस गरेका हुन् । सम्मेलनमा नेपालका तर्फबाट डीआईजी नवराज सिलवालले वन्यजन्तु चोरीसिकारीका विषयमा कार्यपत्र पेस गरेका थिए ।
सम्मेलनका एक सहभागीका अनुसार बंगलादेशले बैंक ठगी, इन्डोनेसियाले डिजिटल क्राइम, बहराइनले साइबर अपराध, चीनले एम्फेटामाइन र मेथाफेटामाइनको कारोबार, यूएनओडीसीले प्रिकर्सर ड्रग, हङकङले म्याचफिक्सिङ र संगठित अपराधबारे कार्यपत्र प्रस्तुत गरेका थिए । भारतले भने वन्यजन्तु चोरीसिकारीबारे कार्यपत्र प्रस्तुत गरेको थियो ।
सम्मेलनमा कार्यपत्र प्रस्तुतिसँगै अन्तरक्रिया भएको थियो । प्रहरी प्रधान कार्यालय अपराध अनुसन्धान विभागका प्रमुख एआईजी विज्ञानराज शर्माले खाडी मुलुकका प्रहरी संगठनको भूमिकाका विषयमा समेत छलफल भएको बताए । उनका अनुसार सम्मेलनमा संगठित अपराधमा देखिएका चुनौती र साइबर सेक्युरिटीका विषयमा समेत गहन छलफल भएको थियो ।
'डिजिटलमार्फत अपराधीले अपनाउँदै आएका नयाँ तौरतरिका र यसलाई नियन्त्रण गर्न साइबर सेक्युरिटीका एप बनाएर इन्टरपोलसँग जोड्न सकिनेलगायत विषयमा छलफल भयो', एआईजी शर्माले भने, 'अन्तरदेशीय अपराध, सीमा सुरक्षा र आतंकवादका विषयमा गहन छलफल भयो । आआफ्नो मुलुकले कुरा राखेपछि अन्तरक्रिया गरियो ।'
बुधबारबाट सुरु भएको सम्मेलन शुक्रबार समापन हुँदैछ । सम्मेलनमा ३३ भन्दा बढी राष्ट्रका एक सय ३२ प्रतिनिधि र इन्टरपोलका अध्यक्ष म्याङ होङ्उई सहभागी छन् । उनी अध्यक्ष भएपछि पहिलो अन्तर्राष्ट्रिय सम्मेलनमा भाग लिन नेपाल आएका हुन् ।
प्रतिक्रिया दिनुहोस !
