काठमाडौंः संसद्को विकास समितिले मुलुकभर रहेका सबै विमानस्थल सञ्चालनमा ल्याउन सरकारलाई निर्देशन दिएको छ । हाल देभभर ५६ वटै विमानस्थल छन् । अन्तर्राष्ट्रिय विमानस्थललाई सहयोग गर्न आन्तरिक उडानका सबै विमानस्थल सञ्चालन गर्नुपर्ने आवश्यकता रहेको समिमितको निष्कर्ष छ । सिंहदरबारमा बिहीबार बसेको विकास समितिको बैठकमा समितिका सभापति रवीन्द्र अधिकारीले यस्तो निर्देशन दिएका हुन् ।
समितिले प्रस्तावित र निर्माणाधीन अन्तर्राष्ट्रिय विमानस्थलको कार्य प्रगति सम्बन्धमा संस्कृति, पर्यटन तथा नागरिक उड्डयन मन्त्री, मन्त्रालयका निमित्त सचिव र सरोकारवालासँग छलफल गरेको छ । अझै पनि त्रिभुवन विमानस्थल विश्वको १० औं जोखिमयुक्त विमानस्थलमा रहेको उल्लेख छ । यसको सुधाका लागि पनि समितिले निर्देशन दिएको छ ।
यसैगरी गौतम बुद्ध अन्तर्राष्ट्रिय विमानस्थलको निर्माणकार्य केही सन्तोषजनक भएतापनि अझ तीव्रताका साथ काम गर्न समितिले संस्कृति, पर्यटन तथा नागरिक उड्डयन मन्त्रालय र ऊर्जा मन्त्रालयले समन्वयन गरी थप प्रभावकारी बनाउन सुझाव दिएको छ । विमानस्थल निर्माणका लागि विद्युत्को डेडिकेडेट फिडर लाइनसमेत तत्काल आवश्यक देखिएको छ ।
सम्झौता पुनरावलोकन गर
राष्ट्रिय गौरवको आयोजना भनिए पनि निजगढ आन्तर्राष्ट्रिय विमानस्थल निर्माण सम्बन्धमा हालसम्म डीपीआर बन्न नसकेको छैन । योसँगै निर्माणका लागि जिम्मा पाएको एलएमडब्लूसँगको कामकारबाहीमा अस्पष्टता एवं पारदर्शीताको अभाव रहेको समितिको ठहर छ । त्यसैले गर्दा निर्माण कम्पनीसँग यसअघि भएको सम्झौता पनि पुनरावलोकन गर्न समितिले सरोकारवाला निकायलाई निर्देश गरेको छ ।
प्रस्तावित तथा निर्माणाधीन अन्तर्राष्ट्रिय निजगढ र पोखरा विमानस्थलको निर्माण छिटोभन्दा छिटो सम्पन्न गर्दै सञ्चालनमा ल्याउनसमेत विकास समितिले सरकारलाई निर्देशन दिएको छ । नेपाललाई कतिवटा अन्तर्राष्ट्रिय र राष्ट्रिय विमानस्थल चाहिन्छ त्यसको निक्यौल गर्न समेत सरकारलाई समितिले निर्देशन दिएको छ ।
साथै कालोपत्रे नभएका विमानस्थललाई कालोपत्रे गराउन, मेघौली र भरतपुरमध्ये कुन विमानस्थल सञ्चालन गर्ने हो त्यसको निक्यौल गर्ने पनि सरकारलाई विकास समितिले निर्देशन दिएको छ ।
यसैगरी दिपायलमा निर्माण भइरहेको विमानस्थलको रनवे ६ सय मिटर बनाउने गरी आवश्यक गृह कार्य गर्न समेत समितिले संस्कृति, पर्यटन तथा नागरिक उड्डयन मन्त्रालय र नागरिक उड्डयन प्राधिकरणलाई निर्देशन दिइएको छ ।
प्रतिक्रिया दिनुहोस !
