काठमाडौं : एसियाली विकास बैंकको स्थापनाको पचासौं वर्षगाँठको अवसरमा नेपाल आर्ट काउन्सिलमा फोटो प्रदर्शनी गरिएको छ । बिहीबारदेखि सुरु भएको फोटो प्रदर्शनी एडीबीका नेपाल प्रमुख केनिची योकोयामा र अर्थसचिव शान्तराज सुवेदीले उद्घाटन गरेका हुन्।
सन् १९६६ मा नेपालमा सुरु भएको एसियाली विकास बैंकले एसियाली मुलुकको विकासमा नाटकीय परिवर्तन ल्याएको बताइएको छ । नेपालमा पहिलो पटक सन् १९६९ मा हवाई यातायात विकासबाट सहयोग गर्न थालेको एडीबीले विभिन्न कालखण्डमा भएको चुनौतीहरूलाई पार गर्दै नेपालीको जीवनस्तर उकास्न सहयोग गरेको छ ।
६० लाख डलरबाट नेपालमा सहयोग सुरु गरेको एडीबीले पाँच सय करोड डलरको सहुलियतपूर्ण ऋण र अनुदान दिइसकेको नेपाल प्रमुख केनिचीले बताए । नेपालमा एडीबीले गर्दै आएका परियोजनाहरू कृषि, हाइड्रोपावर, शिक्षा, विद्युत् ऊर्जा, विमानस्थल निर्माण, सडक सञ्जाल, लैंगिक समानता, सामाजिक समावेशीकरणलगायतका विषयमा तयार पारिएको करिब सयवटा तस्बिर प्रदर्शनीमा राखिएका छन् ।
किरण श्रेष्ठ, विकास रौनियार, मधुप श्रेष्ठ, समिरजंग थापालगायतले खिचेका तस्बिरहरू प्रदर्शनीमा छन् । प्रदर्शनी माघ १२ सम्म चल्नेछ ।
प्रतिक्रिया दिनुहोस !
