टिपरको ठक्करबाट एक जनाको मृत्यु
बुटवल : रुपन्देहीको देवदहमा भएको सडक दुर्घटनामा एक जनाको मृत्यु भएको छ । शनिबार मध्याह्न टिपरको ठक्करबाट मोटरसाइकलमा सवार देवदह–४, भवानीपुर निवासी खिमबहादुर पुनको घटनास्थलमै मृत्यु भएको हो ।
लु १ ख ४६६१ नम्बरको टिप्परले देवदह–५ सिंगाहा भित्री सडकमा लु ६ प ४६४९ नम्बरको मोटरसाइकललाई ठक्कर दिएको हो । टिपरको ठक्करबाट मोटरसाइकलको पछाडि बसेका बुद्धिराज न्यौपाने घाइते भएका छन् । उनको हात कामै नलाग्ने गरी थिचिएको देवदह प्रहरी चौकी प्रमुख भक्ति पाण्डेले जानकारी दिए ।
ठक्करबाट मृत्यु भएका पुन देवदहको भवानी मावि विद्यालय व्यवस्थापन समितिका सदस्य हुन् । ठक्कर दिने टिपर र चालकलाई प्रहरीले नियन्त्रण लिएको छ । भित्री सडकमा पनि तिब्र गतिमा टिपर गुडाएका कारण दुर्घटना भएको हुनसक्ने प्रहरीले अनुमान गरेको छ ।