कांग्रेस नेताको मलामी कांग्रेसै मात्र !
फिदिम : राजनीतिक आस्थाका आधारमा कुनै पनि मौकाको फाइदा उठाउन खोज्नु नेपाली समाजका लागि नौलो कुरा होइन । तर, पछिल्लो समयमा मृत शरीरको अन्त्येष्टिमा सहभागी हुने मलामीमा पनि राजनीतिक आस्थाको भरमा सहभागी हुनेहरूको संख्या बढ्दै छ ।
नेपाली कांग्रेसका जिल्ला सदस्य पूर्णकुमार आङ्देम्बेका भिनाजु तथा चिलिङदिनका नेपाली कांग्रेसका सदस्य राजेन्द्रकुमार चेम्जोङको गत बुधबार दिउँसो फिदिमको हेवाखोलामा ल्याएर अन्त्येष्टि गरियो । उनको अन्त्येष्टिमा मलामीको संख्या कम थियो । तर, केही आफन्तबाहेक पाँचथर कांग्रेसका शीर्ष नेता र कार्यकर्ता सहभागी थिए ।
नांगिन १ खमारेका ३५ वर्षका युवक लेखनाथ मिश्रको मंगलबार हेवाखोलामै ल्याएर अन्त्येष्टि गरियो । मिश्रको अन्त्येष्टिमा मलामीको अभाव भयो । उनको अन्त्येष्टिमा जम्मा २४ जना मात्र मलामी सहभागी थिए । उनको अन्त्येष्टिमा राजनीतिक हैसियत बनाएका कुनै पनि नेता तथा कार्यकर्ता सहभागी नभएको मिश्रको मलामीमा सहभागी फिदिमका लेखक तथा समाजसेवी रामप्रकाश गुरुङले बताए ।
ठूलाबडा नेता र सम्पन्न मान्छे बस्ने भएकाले सहर स्वार्थी छ । स्वार्थी सहरका मान्छे मलामी जाँदा पनि स्वार्थ खोज्छन् ।
मिश्र र चेम्जोङको अन्त्येष्टि उदाहरण मात्र हो । कुनै पनि राजनीतिक दलका नेता तथा कार्यकर्ताको अन्त्येष्टिमा सम्बधित दलका नेता तथा कार्यकर्ता मलामीका लागि लर्को लाग्छन् । राजनीतिक हैसियत राम्रो बनाएका मान्छेको अन्त्येष्टिमा झनै भीडभाड हुन्छ । ठूलो पार्टीका ठूला नेताको धेरै मलामी हुन्छ। तर, राजनीतिक हैसियत नबनाएकाहरूको अन्त्येष्टिमा मलामीको अभाव हुने स्थिति छ।
‘लासमाथिको राजनीति भयानक बन्दै छ’, गुरुङले भने, ‘राजनीतिक हैसियत अनि हुँदा खाने र हुनेखानेबीचको अन्तर मलामीमा समेत देखिन थालेको छ ।’ राजनीतिको उच्चपदमा रहेका र आर्थिक रूपमा सम्पन्न मान्छेको मृत्यु भए मलामीको ओइरो लाग्छ । राजनीतिक आस्था नभएको र विपन्न परिवारका सदस्यको मृत्यु भए मलामी पाउनै मुस्किल बनेको छ ।
आस्थाको भरमा मलामी जानु स्वाभाविक भएको तरुण दल पाँचथरका अध्यक्ष सुमन लामा बताउँछन् । ‘आफ्नो पार्टीको मान्छेसँग धेरै नै आत्मीय भइन्छ’, उनले भने, ‘त्यसैले पनि मलामीमा आस्था जोडिएको हो ।’
जिल्लाका ग्रामीण क्षेत्रमा राजनीतिक आस्थाको भरमा मलामी जाने क्रम कमै छ । सुविधासम्पन्न सहरमा भने मलामी जान पनि आस्थाले महत्व राख्ने गरेको पाइएको छ । ‘ठूलाबडा नेता र सम्पन्न मान्छे बस्ने भएकाले सहर स्वार्थी छ’, गुरुङले भने, ‘स्वार्थी सहरका मान्छे मलामी जाँदा पनि स्वार्थ खोज्छन्।’