काठमाडौं : प्रमुख प्रतिपक्षी एमालेका अध्यक्ष केपी शर्मा ओलीले एमालेसँग कसैले कुनै छक्कापन्जा गर्न नसक्ने बताएका छन् । पार्टीनिकट स्थानीय निकाय कर्मचारी संघको भेला शनिबार राजधानीमा उद्घाटन गर्दै ओलीले यस्तो बताएका हुन् ।
‘स्थानीय निकायको चुनाव कहिले हुन्छ ? तर हुन त हुन्छ, हुनैपर्छ । यस विषयमा प्रधानमन्त्रीसँग कुरा भइरहेको छ। फेरि पनि कुरा गर्छु । सिनेमा हलमा छक्कापन्जा चल्ला तर एमालेसँग कुनै छक्कापन्जा चल्दैन’, उनले भने ।
ओलीले निर्वाचन नगराएर कोही पनि त्यत्तिकै बस्न नसक्ने बताए । कर्मचारीलाई निर्वाचनका लागि तयार रहन पनि उनले निर्देशन दिए । ‘चुनाव हामी गराउँछौं । जुनसुकै बेला पनि चुनाव हुनसक्छ । तपाईंहरू तयार भएर बस्नुस्’, उनले भने । जुनसुकै तहको निर्वाचन भए पनि स्थानीय निकायका कर्मचारी त्यसमा खटिनुपर्ने भएकाले त्यसका लागि मनस्थिति बनाउन उनले निर्देशन दिए । सरकार निर्वाचन गर्ने विषयमा नभई त्यसलाई छल्ने काममा बढी केन्द्रित भएको उनको आरोप थियो ।
संविधान संशोधन प्रस्ताव कुनै हालतमा अघि बढ्न नदिने बताउँदै उनले भने, ‘देशमा एमाले छ । एमाले रहुन्जेल संविधानविपरीत काम हुन दिनेछैन । संसद्मा पेस भएको संशोधन प्रस्ताव संविधानविपरीत छ ।’
पूर्वकानुनमन्त्री अग्नि खरेलले सभामुख ओनसरी घर्तीमगर आफैंले संसद्मा दिएको रुलिङविपरीत संविधान संशोधन प्रस्ताव टेबुल गरेको बताए । ‘संसद्मा हामी सबैले उभिएर विरोध गरेका थियौं तर त्यसो हुँदाहुँदै प्रस्ताव टेबुल भयो ।
एमाले अलि भलाद्मी भयो भनेरसमेत हामीलाई आरोप लाग्यो ।’ उनले अब संसद्मा त्यसरी भलाद्मी भएर सविधानविरोधी प्रस्ताव अघि बढ्न नदिने बताए । संसद्मा आउनै नमिल्ने प्रस्ताव पासफेलका कुरासम्म पुग्न नहुने उनले जिकिर गरे ।
प्रतिक्रिया दिनुहोस !
