काठमाडौं: एसियाली क्षेत्रीय संगठन बे अफ बंगाल इनिसिएटिभ फर मल्टिसेक्टरल टेक्निकल एन्ड इकोनोमिक कोअपरेसन (बिमस्टेक) को 'सिनियर अफिसियल्स मिटिङ' (एसओम) फेब्रुअरी ५, ६ र ७ मा काठमाडौंमा आयोजना हुने भएको छ ।
परराष्ट्र सचिवस्तरीय बिमस्टेक 'सिनियर अफिसियल्स मिटिङ' काठमाडौंमा हुन लागेको हो । बैठकका लागि तयारी अघि बढेको परराष्ट्र मन्त्रालयले जनाएको छ ।
उक्त बैठकले बिमस्टेकको शिखर सम्मेलनको मितिबारे टुंगो लगाउने सम्भावना रहेको अधिकारीहरूले बताए । बिमस्टेकका महासचिव सुमिथ नकान्दालाले आइतबार यस सम्बन्धमा परराष्ट्रसचिव शंकरदास बैरागीसँग भेटी परामर्श गरेका छन् । उनले बिमस्टेकको शिखर सम्मेलन तयारीबारे समेत जिज्ञासा राखेका थिए । अहिले नेपाल बिमस्टेकको अध्यक्ष देश हो ।
नेपालले सन् २०१७ भित्र बिमस्टेक शिखर सम्मेलन आयोजना गर्ने घोषणा यसअघि नै गरिसकेको छ । सरकारले शिखर सम्मेलन सन् २०१६ मै गर्ने योजना बनाए पनि भूकम्प र भारतीय नाकाबन्दीका कारण उक्त योजना पछि धकेलिएको थियो । परराष्ट्र सचिव बैरागीले बिमस्टेकको सिनियर अफिसियल्यस मिटिङ, बिमस्टेकको शिखर सम्मेलन तयारी र बिमस्टेकको सचिवालय, बजेटलगायत विषयमा कुराकानी भएको बताए ।
बिमस्टेकको शिखर सम्मेलन लामो समयदेखि हुनसकेको छैन । शनिबार नेपाल आएका नाकाबन्दला सोमबार फर्किंदैछन् । यसअघि बिमस्टेकका सरकार प्रमुखको आउटरिच सम्मेलन भारतको गोवामा गत अक्टोबरमा भएको थियो ।
प्रतिक्रिया दिनुहोस !
