सत्तारुढ दल र मधेसी मोर्चाको बैठक : एमालेलाई सहमतिमा ल्याउने निर्णय

काठमाडौं : प्रधानमन्त्री निवास बालुवाटारमा सत्तारुढ दल र मधेसी मोर्चाका शीर्ष नेताबीच छलफल भएको छ । नेकपा (माओवादी केन्द्र), नेपाली कांग्रेस र मधेसी मोर्चाका शीर्ष नेता सहभागी बैठकमा सहमतिकै आधारमा राजनीतिक निकास खोज्ने सहमति भएको प्रधानमन्त्री सचिवालयले जनाएको छ ।

प्रधानमन्त्री पुष्पकमल दाहाल ‘प्रचण्ड’को आह्वानमा मंगलबार साँझ बसेको बैठकले सहमतिमै राजनीतिक निकास खोज्न छलफललाई तिब्रता दिने निर्णय गरेको हो ।

बैठकमा स्थानीय तहको निर्वाचन, संविधान संशोधन र स्थानीय तह पुनसंरचना आयोगले बुझाएको प्रतिवेदनका विषयमा छलफल केन्द्रित भएको थियो ।

बैठकमा प्रधानमन्त्रीले राजनीतिक निकासका लागि स्थानीय तहको निर्वाचनमा जानेबारे नेताहरुको धारणा मागेका थिए । बैठकमा सत्ता पक्ष, प्रतिपक्षी दल (एमाले) र मधेस केन्द्रित दलबीच सहमति जुटाएर संविधान संशोधन, स्थानीय तह पुर्नसंरचना आयोगको प्रतिवेदन कार्यान्वयन र निर्वाचनको मिति घोषणाबारे टुंगोमा पुग्ने निर्णय भएको प्रधानमन्त्रीको निजी सचिवालयले जनाएको छ।

सत्तारुढ दल र मधेसी मोर्चाको बैठकमा प्रधानमन्त्री प्रचण्ड, गृहमन्त्री बिमलेन्द्र निधि, माओवादी केन्द्रका नेता रामबहादुर थापा, मातृका यादव, कांग्रेस नेता रामशरण महत, संघीय समाजवादी फोरमका अध्यक्ष उपेन्द्र यादव, तराई मधेश लोकतान्त्रिक पार्टीका अध्यक्ष महन्थ ठाकुर, नेताहरु राजेन्द्र महतो, अनिलकुमार झा, हृदयेश त्रिपाठीलगायत सहभागी थिए।