काठमाडौं : स्थानीय निर्वाचनको चर्चा चलिरहेका बेला संसदले निर्वाचन आयोग र मतदाता नामावली सम्बन्धी विधेयक बुधवार पारित गरेको छ ।
दुई विधेयक पारितपछि निर्वाचनको आधार तय भएको भन्दै सांसदले अबिलम्ब चुनावको मिति घोषणा गर्न सरकारसँग माग गरेका छन् । निर्वाचन सम्बन्धी अन्य तीन विधेयक सांसदको राज्य व्यवस्था समितिमा छलफलका क्रममा छन्।
संसदको बुधबारको बैठकमा एमाले सांसद गणेश पहाडीले निर्वाचन गर्न सरकारले आलटाल गरेको भन्दै आपत्ति जनाए । एमालेकै कृष्णभक्त पोखरेलले स्थानीय तह पुनर्संरचना आयोगको प्रतिवेदन इन्कार गर्न नमिल्ने भन्दै त्यसलाई स्वीकार गरेर निर्वाचनको मिति घोषणा गर्न सरकारसँग माग गरे ।
एमालेकै अर्का सांसद तुलाराज विष्टले चैत वा वैशाखमा स्थानीय निर्वाचन हुने गरी मिति घोषणा गर्न माग गरे । नेमकिपाका प्रेम सुवालले स्थानीय तहको निर्वाचन गर्न दिन्न भन्नु निर्दलीयता भएको आरोप लगाए ।
१८ वर्षदेखि स्थानीय निकाय जनप्रतिनिधिविहीन हुंदा करोडौँ रकम भ्रष्टाचार र अनियमितता भएको भन्दै उनले निर्वाचन घोषणा गर्न सरकारसँग माग गरे ।
एमालेका सांसद जनार्दन ढकालले उद्घाटन र शिलान्यासका कार्यक्रम छोडेर चुनावको मिति तोक्ने राजनीतिक वातावरण बनाउन प्रधानमन्त्रीसँग आग्रह गरे ।
तमलोपाका बृजेश गुप्ताले भने २ नम्बर प्रदेशमा छलफल नै नगरी स्थानीय तहको संख्या र संरचना बनाइएको भन्दै आयोगको प्रतिवेदन सच्याउनुपर्ने माग गरे ।
प्रतिक्रिया दिनुहोस !
