डा. महत सहभागी कार्यक्रममा प्रहरी र प्रदर्शनकारीबीच झडप

विदुर : नुवाकोटको पूर्वीभेगमा रहेको खानीगाउँ गाविसको ढिकुरेमा बुधबार कांग्रेसका केन्द्रीय सदस्य तथा पूर्वअर्थमन्त्री डा. रामशरण महतको कार्यक्रममा प्रहरी र प्रदर्शनकारीबीच झडप भएको छ । डा. महत सहभागी कार्यक्रममै ढुंगा प्रहार भएपछि प्रहरीले अश्रुग्यास प्रहार गरेको छ ।

स्थानीय निकाय पुनर्संरचनाको विषयलाई लिएर नुवाकोटको पूर्वीभेगमा रहेको खानीगाउँ, चौघडा, सूर्यमती र थानसिङ गाविसमा लिखु गाउँपालिका बचाउ संघर्ष समिति गठन भई दुई सातादेखि चरणबद्ध आन्दोलन भइरहेको छ ।

स्थानीयवासीको चाहना एवं भावनाअनुसार आफूले स्थानीय निकाय पुनर्संरचना आयोगलाई सुझाव दिएको उल्लेख गर्दै आएका डा. महत आन्दोलनले जनतालाई हित नगर्ने सन्देश दिने उद्देश्यले कडा सुरक्षाबीच खानीगाउँ पुगेका थिए ।

उक्त क्षेत्रका सांसदसमेत रहेका डा. महतको सुरक्षार्थ एकैपटक एक सयभन्दा बढी सशस्त्र र नेपाल प्रहरी परिचालन भएका थिए । कडा सुरक्षाबीच पनि प्रदर्शनकारीले कार्यक्रमस्थलमा ढुंगा प्रहार गरेपछि प्रहरीले जवाफी फायरिङ गरेको हो ।

कार्यक्रम भइरहेका बेला महतकै अगाडि ढुंगा प्रहार भएपछि अ श्रुग्यास प्रहार गरिएको जिल्ला प्रहरी कार्यालय नुवाकोटका प्रहरी निरीक्षक जीतेन्द्र बस्नेतले जानकारी दिए । उनका अनुसार प्रदर्शनकारीलाई तितरबितर पार्न ३० राउन्ड अ श्रुग्याँस प्रहार गरिएको छ ।

प्रदर्शनकारीले ढुंगा प्रहार गरेपछि केही समय झडप भएको थियो । प्रदर्शनकारीले डा. महतविरुद्ध नाराबाजीसमेत गरेका थिए । सुरक्षा घेराबीच डा. महतले संयम भएर विकास निर्माणका कार्यमा सहभागी हुन स्थानीयलाई आग्रह गरे । स्थानीयकै भावनाअनुसार स्थानीय निकाय पुनर्संरचना गरिएको उनले बताए।

कार्यक्रममा सांसद बहादुरसिंह तामाङले स्थानीयवासीलाई शान्तिपूर्ण कार्यक्रममा आक्रमण नगर्न आग्रह गरे । वास्तविकता बुझेर मात्र संघर्षका कार्यक्रम गर्न आन्दोलनरत स्थानीयवासीलाई उनको आग्रह थियो ।