नेपाल-भारत संयन्त्रको दोस्रो बैठक सोमबार
काठमाडौःनेपाल-भारत संयुक्त अनुगमन संयन्त्रको दोस्रो बैठक यही सोमबार काठमाडौंमा हुने भएको छ । बैठकमा नेपालमा रहेका भारतीय लगानीका परियोजना निर्माणमा देखिएका समस्या, तिनको समाधान उपायबारे छलफल हुने जानकारी परराष्ट्र मन्त्रालयका अधिकारीले दिए । यसअघि उक्त बैठक गत नोभेम्बरमा काठमाडौंमै बसेको थियो ।
बैठकमा भारतीय लगानीमा निर्माणाधीन अरुण तेस्रो र माथिल्लो कर्णाली परियोजनामा भएको प्रगति सम्बन्धमा समीक्षा हुनेछ । त्यस्तै नेपालको पुनर्निर्माणमा भारतीय सहयोगबारे पनि समीक्षा हुने भएको छ ।
वीरगन्ज र विराटनगरमा एकीकृत सुरक्षा जाँच चौकी निर्माणमा भएको प्रगतिबारे पनि बैठकमा छलफल हुनेछ । भारतले एकीकृत सुरक्षा जाँच चौकी निर्माणमा नेपालले ढिलाइ गरेको आरोप लगाउँदै आएको थियो ।
परराष्ट्रसचिव शंकरदास बैरागीले नेपाल-भारत संयुक्त अनुगमन संयन्त्रको गठनपछि भारतीय लगानीमा निर्माण भइरहेका परियोजनाको प्रगतिबारे मूल्यांकन गर्न सहज भएको बताए । ‘कुन परियोजनामा के प्रगति भइरहेको छ भन्नेबारेमा संयन्त्रको बैठकमा विस्तृत छलफल हुन्छ', उनले भने । पञ्चेश्वर परियोजनाको विस्तृत परियोजना प्रतिवेदन फागुन पहिलो साता टुंग्याउने विषयमा नेपाल र भारतबीच सहमति भइसकेको छ ।
‘पञ्चेश्वर परियोजनाको विस्तृत परियोजना प्रतिवेदन टुंगिएपछि चाँडै कार्यान्वयनमा आउनेछ', नेपालका लागि भारतीय राजदूत रञ्जित रेले बुधबार पत्रकारसँग भने । बैठकमा परराष्ट्रसचिव बैरागीले नेपालको नेतृत्व गर्नेछन् भने भारतीय पक्षको नेतृत्व भारतीय राजदूत रेले गर्नेछन् ।
बैठकमा नेपालका तर्फबाट अर्थ, ऊर्जा, प्रधानमन्त्री कार्यालय, भौतिक योजना, परराष्ट्र मन्त्रालयका अधिकारी सहभागी हुनेछन् । भारतीय दूतावासका प्रतिनिधिहरू भारतीय पक्षबाट सहभागी हुनेछन् । प्रधानमन्त्री पुष्पकमल दाहालको भारत भ्रमणका क्रममा भएको सहमतिअनुसार स्थापित संयन्त्रको बैठक आवश्यकताअनुसार बस्ने गरेको छ ।
सम्बन्धलाई आर्थिक साझेदारीमा केन्द्रित गरौः रे
नेपालका लागि भारतीय राजदूत रञ्जित रेले नेपाल-भारत सम्बन्धलाई आर्थिक साझेदारीमा केन्द्रित गर्न आवश्यक रहेको बताएका छन् । नेपाल-भारत सम्बन्धलाई २१ औं शताब्दी कसरी थप बलियो बनाउने भन्नेबारे दुवै देशले सोच्नुपर्ने बताए ।
रिपोर्टर्स क्लबले गरेको कार्यक्रममा रेले नेपाल-भारत द्विपक्षीय सम्बन्ध अब सामाजिक, सांस्कृतिक, धार्मिकका साथ साथै आर्थिक साझेदारीमा केन्द्रित गर्नुपर्ने धारणा राखे ।
‘पञ्चेश्वर योजनाको कार्यान्वयन हुँदैछ । यसको डीपीआर अन्तिम चरणमा पुगेको छ । यही वर्षको मध्यतिर यो महायोजना लागू हुन्छ । यो लागू हुनेबित्तिकै सुदूरपश्चिममा मात्रै नभएर पूरै नेपालमै विकासको तरंग पैदा हुन्छ', उनले भने । माथिल्लो कर्णाली, अरुण तेस्रो परियोजना पनि अघि बढिरहेको रेले उल्लेख गरे ।
‘हुलाकी राजमार्गको नयाँ मोडेलमा काम भइरहेको छ । हालैमात्र कैलालीमा उद्घाटन गरियो । अहिले तराई मधेसमा काम तीव्र गतिमा अघि बढिरहेको छ', उनले भने । त्यस्तै उनले नेपाल-भारतबीचका पछिल्ला उच्चस्तरीय भ्रमणले राजनीतिक सम्बन्धमा प्रगति भइरहेको बताए ।
‘नेपालका प्रधानमन्त्री पुष्पकमल दाहाल दुईपटक भारत भ्रमणमा जानुभयो । परराष्ट्रमन्त्री प्रकाशशरण महत पनि जानुभएको छ । त्यसैले द्विपक्षीय सम्बन्ध थप बलियो बनाउने प्रयास भैरहेको छ', उनले भने ।
प्रतिक्रिया दिनुहोस !
