काठमाडौं: भारतको ६८ औ गणतन्त्र दिवसको अवसरमा आयोजित कार्यक्रममा नेपाललाई २० एम्बुलेन्स प्रदान गरिएको छ ।
भारतीय दूतावासमा आयोजित कार्यक्रममा नेपालको विकासको यात्रामा भारत सरकारको सहयोगको प्रतिवद्धता सहित नेपालका विभिन्न जिल्लाका अस्पतालहरु, नाफा कमाउने उद्देश्य नभएका परोपकारी संस्थाहरु तथा शैक्षिक संस्थाहरुलाई २० एम्बुलेन्स र चार वटा बस उपहार प्रदान गरिएको छ ।
भारतीय राजदूत रणजीत रायले नेपालमा शैक्षिक र स्वास्थ्य सेवा सवल गराउन एम्बुलेन्स तथा बसको साँचो हस्तान्तरण गरेका थिए ।
भारतले सन् १९९४ देखि नेपालको ७३ जिल्लामा रहेका विभिन्न संस्थालाई ६ सय दुई एम्बुलेन्स उपहार स्वरुप प्रदान गरेकोछ । त्यस्तै नेपालका २८ जिल्लामा रहेकाविभिन्न शैक्षिक तथा कल्याणकारी संस्थाका विद्यार्थीलाई विद्यालयको सहज पहुँचका लागि एक सय १८ वटा बस प्रदान गरिसकेको छ ।
गणतन्त्र दिवसको अवसरमा आयोजित कार्यक्रममा राजदूत रायले राष्ट्रिय झण्डा फहराइ भारतका राष्ट्रपतिले राष्ट्रका नाममा दिएको सन्देश पढेर सुनाएका थिए ।
सो अवसरमा भारतका राष्ट्रपति प्रणव मुखर्जीबाट भएको नेपाल भ्रमणलाई समेटेर तयार पारिएको कफी टेवल पुस्तिका विमोचन गरिएको थियो । कार्यक्रममा राजदूतावासको रक्षाविभागद्वारा नेपालमा बस्ने भारतीय भूपूहरुको लागि भारत सरकारले प्रदानगर्ने कल्याण कार्यक्रमहरु समेटेर प्रकाशित भूपू २०१६ नामक पुस्तकको पनि विमोचन गरिएको थियो ।
राजदूतले भारतीय सेनाका १४ भूपू सैनिक, उनीहरुका विधवा, आश्रित तथा शारीरिक रुपले अशक्त भूपू सैनिकहरुलाई रक्षा सहचारी कल्याण कोषबाट तीन करोड ७५ लाखको चेक तथा कम्बल वितरण गरिएको थियो । एक भूपू संगठनलाई दुई एम्बुलेन्स पनि उपहार दिईएको छ ।
कार्यक्रममा नेपालका दुर्गम स्थानमा रहेका पुस्तकालय, प्राथमिक विद्यालय, उच्चमाध्यमिक विद्यालय तथा महाविद्यालयसहित ६० शैक्षिक संस्था तथा तालिम प्रतिष्ठानहरुलाई पुस्तकहरु समेत प्रदान गरिएको छ ।
प्रतिक्रिया दिनुहोस !
