सुर्खेत उपत्यकामा भेरी नदीबाट पानी ल्याइने

सुर्खेत : सुर्खेत उपत्यकामा बढ्दो खानेपानीको संकट टार्न भेरी नदीको पानी ल्याउने तयारी गरिएको छ । जनसंख्या वृद्धि भएसँगै उपत्यकामा खानेपानीको संकट भएपछि भेरी नदीबाट पम्पिङ गरेर पानी ल्याउने प्रक्रिया थालिने भएको हो । बर्सौंदेखिको खानेपानी समस्या समाधानका लागि आयोजनाको आवश्यक प्रक्रिया चालू आर्थिक वर्षमै सुरु हुनेछ ।

हाल उपत्यकामा खानेपानीको आपूर्ति गर्दै आएको झुप्रा बृहत् खानेपानी तथा सरसफाइ उपभोक्ता संस्थाले भेरी नदीको पानी ल्याउन आवश्यक प्रक्रिया अगाडि बढेको जनाएको छ । भेरी नदीको पानी पम्पिङ गरेर उपत्यकामा ल्याउन चालू आर्थिक वर्षभित्रै आवश्यक काम थालिने संस्थाले बताएको हो ।

उपत्यकामा हाल दैनिक ४५ लाख लिटर खानेपानी अपुग रहेको र उक्त संकट टार्न भेरीको पानी ल्याउन लागिएको झुप्रा खानेपानी संस्थाका अध्यक्ष कुलमणि देवकोटाले बताए । चालू आवमै भेरीबाट पानी ल्याउन उक्त आयोजनाको विस्तृत सम्भाव्यता अध्ययन गरी डिटेल प्रोजेक्ट रिपोर्ट तयार पारिने झुप्रा खानेपानी संस्थाका अध्यक्ष कुलमणि देवकोटाले जानकारी दिए ।

‘खानेपानीको दीर्घकालीन समाधान खोज्दैछौं, त्यसका लागि भेरीको पानी ल्याउने प्रक्रिया सुरु भएको छ । पानी आएपछि आपूर्ति सहज हुनेछ’, उनले भने । सुर्खेत उपत्यका सम्भावित प्रदेशको राजधानी भएको र यहाँको खानेपानी समस्या समाधानका लागि वैकल्पिक स्रोतको जोहो गर्न लागिएको उनको भनाइ छ । खानेपानीको आपूर्ति सहज बनाउन खरीखोला र बोरीखोला आयोजना निर्माण तीव्र पारिएको उनले बताए । आगामी फागुनभित्र उपभोक्ताको धारामा पानी खसाल्ने संस्थाको प्रतिबद्धता छ ।

यस्तै बुलबुलेको मुहान सञ्चालन, भसना बाँध र पातलगंगामा रहेको पानीको स्रोतको पनि प्रयोग गरिनेछ । अर्कोतर्फ इत्राम र खोर्केखोलाको मुहानमा पनि मर्मत गरेर उपत्यकामा पानीको आपूर्ति सहज बनाउने योजना रहेको संस्थाले बताएको छ । यसले हालको संकट टर्ने र उपत्यकामा खानेपानी सहज हुने अपेक्षा गरिएको छ । संस्थाले खानेपानीको आपूर्ति सहज बनाउनक चुहावट नियन्त्रणलाई कडाइका साथ अगाडि बढाउने रणनीति बनाएको छ ।

सरकारले चालू आवको बजेट भाषणमै भेरीको पानी सुर्खेत उपत्यकामा ल्याउन पहल गरिने घोषणा गरिसकेको छ ।

हाल चुहावटको मात्रा २८ प्रतिशत रहेकोमा आगामी वर्षभित्र १५ प्रतिशतमा झार्ने संस्थाको तयारी छ । चुहावट र जथाभावी प्रयोगका कारण पनि पानीको समस्या बढेकाले संस्थाले अब भेरीको पानी ल्याउनुको विकल्प नभएको उल्लेख गरेको छ । हाल संस्थामार्फत उपत्यकामा १४ हजारभन्दा बढी धारा जडान भएका छन् । यस्तै तीन हजार ६ सय धारा जडानको सूचीमा छन् ।

उपत्यकाको जनसंख्या बढ्दै गएको र पानीको मुहानमा स्रोत घट्दै गएका कारण पानीको अभाव भएको हो । यो समस्या समाधानका लागि संस्थाले विभिन्न योजना अगाडि सारेको छ । संस्थाले पानीको आपूर्ति सहज बनाउने, वैकल्पिक स्रोतको जोहो गर्ने, चुहावट रोक्ने, पानीको सही प्रयोगबारे जनचेतना जगाउने, उपभोक्तालाई महसुल बुझाउन सहज सुविधा प्रदान गर्ने, संस्थाको कार्यालय भवन स्तरोन्नति गर्ने र अन्य सुधारका योजना पनि अघि सारेको छ ।

सुर्खेत उपत्यकाको खानेपानी आपूर्ति सहज बनाउन बेलैमा सोच्नुपर्ने सांसद सीता नेपालीको भनाइ छ । उपत्यका प्रादेशिक राजधानी हुने सम्भावना बढेकाले अब भेरी र कर्णाली नदीबाट पानी ल्याउनेतर्फ प्रक्रिया सुरु हुनुपर्ने उने बताइन् । वैकल्पिक स्रोतको पहिचान गर्दै थप पानी उपत्यकामा ल्याउन आफूले आवश्यक सहयोग एवं पहल गर्नेसमेत उनले प्रतिबद्धता जनाइन् । यसबारेमा सरकार र संसद्मा आवश्यक पहल थाल्ने उनको भनाइ छ । भेरीको पानी ल्याउन नसके अब उपत्यकामा खानेपानीको हाहाकार हुने संस्थाका पूर्वअध्यक्ष बालाराम शर्माले बताए ।

यहाँका सर्वसाधारणले समेत दीर्घकालीन समस्या समाधानका लागि भेरीको पानी ल्याउनेतर्फ पहल थाल्न आग्रह गरेका छन् । खानेपानीमा अनावश्यक राजनीति गर्न नहुने उनीहरूको भनाइ छ । सरकारले चालू आवको बजेट भाषणमै भेरीको पानी उपत्यकामा ल्याउन पहल गरिने घोषणा गरिसकेको छ ।