विभत्स हत्यापछि फालिएको अवस्थामा शव भेटियो
विराटनगर : मोरङको बेलबारी नगरपालिका ७ गडगाउँमा विभत्स रुपमा हत्या गरेर फालिएको अवस्थामा बिहीबार एक पुरुषको शव भेटिएको छ।
घाटी, अनुहार तथा शरीरका विभिन्न भागमा धारिलो हतियार प्रहार गरेर हत्या गरेपछि पैनीमा फालेको अवस्थामा शव फेला परेको इलाका प्रहरी कार्यालय बेलबारीका प्रहरी निरीक्षक रामजी कटवालले बताए ।
हत्या गरिएका पुरुषको पहिचान हुन सकेको छैन । अन्दाजी ३५-३६ वर्षीय मंगोलियन अनुहारका पुरुषको शव भेटिएको कटवालले बताए ।
शव सडेर दुर्गन्धित भएको अवस्थामा फेला परेका कारण ८-१० दिन अघि नै हत्या गरेको हुनसक्ने प्रहरीको अनुमान छ । सडेर पोष्टमार्टम गर्न सक्ने अवस्था नभएपछि शवको डिएनए परीक्षणका लागि बीपी कोइराला स्वास्थ्य विज्ञान प्रतिष्ठान धरान पठाइएको कटवालले बताए।
मानवीय चहलपहल कम हुने स्थानमा शव फेला पारिएको बताउँदै कटवालले भने, ‘घाँस काट्न गएका किसानले थाहा पाएर प्रहरीलाई खवर गरेका थिए।’
प्रतिक्रिया दिनुहोस !
