दाङः नेकपा एमालेका उपाध्यक्ष युवराज ज्ञवालीले तत्काल चुनाव मिति घोषणा नगरे प्रचण्ड सरकारको दिनगन्ती सुरु हुने बताएका छन् ।
प्रेस चौतारी नेपाल दाङले शुक्रबार तुल्सीपुरमा आयोजना गरेको पत्रकार सम्मेलनमा बोल्दै ज्ञवालीले आफूहरु चुनावको पक्षमा भएपनि सरकारले चुनावको मिति घोषणा गर्न नसकेको बताए । एकदुई दिनभित्रै चुनाव मिति घोषणा गर्न नसके प्रचण्ड सरकारप्रति जनताको विश्वास गुम्दै जाने उनको भनाई थियो ।
वर्तमान सरकारले संविधान कार्यान्वयन गर्ने बेला अरु बखेडा झिकेर संविधान कार्यान्वयन छायाँमा पार्न खोजेको ज्ञवालीले आरोप लगाए ।१५ वर्षदेखि स्थानीय निकायको चुनाव नहुँदा धेरै समस्या भएको भन्दै ज्ञवालीले भने-‘स्थानीय निकायको नभई स्थानीय तहको चुनाव हुनुपर्छ।'
संविधान संशोधन थाती राखेर संविधान कार्यान्वन्यनका लागि सबै दल लाग्नुपर्ने उनको भनाई थियो । संविधान कार्यान्वयनमा चुनौति देखिएको भन्दै ज्ञवालीले संविधान घोषणा गर्ने सबै शक्तिहरु एक हुनुपर्ने जोड दिए । ‘अब कुनै ठाउँमा एमालेको अवरोध छैन् ' उनले भने ।
प्रतिक्रिया दिनुहोस !
