पर्वतः प्रधानमन्त्री पुष्पकमल दाहाल ‘प्रचण्डले' आगामी २०७४ को माघ ७ गतेसम्म मुलुकमा तीनै तहको निर्वाचन सम्पन्न गर्नुपर्ने भएकाले त्यसको तयारीमा जुट्न पर्वतका कार्यालय प्रमुखलाई निर्देशन दिएका छन् ।
बिहीबार पर्वत सदरमुकाम कुश्माबजारमा आयोजित पर्वत महोत्सवको उद्घाटनका लागि आएका दाहालले फर्किने बेला पर्वतका कार्यालय प्रमुखलाई निर्देशन दिएका हुन् । उनले वैशाख अन्तिम साता स्थानीय तह, कात्तिकमा प्रदेश र माघ पहिलो साता प्रतिनिधि सभाको निर्वाचन गर्नेगरी सरकार अघि बढेको बताए ।
उनले अब केही दिनभित्रै स्थानीय तहको निर्वाचनको मिति घोषणा हुने बताएको पर्वतका प्रमुख जिल्ला अधिकारी शम्भुप्रसाद मरासिनीले जानकारी दिए । ‘स्थानीय तहको निर्वाचन वैशाख अन्तिम साता हुन्छ, तपाईंहरु ढुक्क हुनुहोस् र त्यसको तयारीमा लाग्नुहोस् ।' उनले भने । हल्ला सुनेर निर्वाचन हुँदैन कि भन्ने भ्रम नपाल्न पनि दाहालले निर्देशन दिएको प्रजिअ मरासिनीले जानकारी दिए ।
उनले पर्वतका कार्यालय प्रमुखलाई जनताको काममा कुनै पनि कन्जुस्याइँ नगर्न आग्रह गरे । सरकारी कर्मचारीको सेवाबाट मात्रै आम नागरिकले राज्य र लोकतन्त्रको अनुभूति गर्ने भएकाले सेवा प्रवाहलाई सुस्त, चुस्त र प्रभावकारी बनाउन निर्देशन दिए । । भ्रष्टाचार न्यूनीकरणमा सघाउ पुर्याउन र बढ्दो बेरुजु फछ्र्यौटमा ध्यान दिन पनि दाहालले निर्देशन दिएका थिए ।
प्रधानमन्त्री दाहालले मुलुक संविधानको कार्यान्वयनसँगै आर्थिक समृद्धिको दिशामा अघि बढेको बताउँदै जिल्लामा निर्माणाधीन राष्ट्रिय गौरवका योजना र अन्य भौतिक पूर्वाधार विकासका काममा कुनै अवरोध आउन नदिन पनि सम्बन्धित कार्यालय र सुरक्षा निकायलाई निर्देशन दिए । ‘काम हुन सकेन, बजेट खर्च हुन सकेन भने सरकारले अपेक्षित सफलता हासिल गर्न सक्दैन त्यसैले कार्यालयप्रमुख गम्भीर भएर लाग्न जरुरी छ उनको भनाई उद्धृत गर्दै प्रजिअ मरासिनीले जानकारी दिए ।
सो अवसरमा प्रजिअ मरासिनीले जिल्लाको समग्र वस्तुस्थिति जानकारी दिँदै प्रधानमन्त्रीको निर्देशन पालना गर्नका लागि पहल गर्ने प्रतिबद्धता व्यक्त गरेकका थिए ।
पार्टी कार्यकर्तालाई निर्वाचनमा जुट्न निर्देशन
यसैबीच, प्रधानमन्त्री प्रचण्डले नेकपा माओवादी केन्द्र पर्वतका कार्यकर्तालाई स्थानीय तहको निर्वाचनमा जुट्न निर्देशन दिएका छन् ।
केही दिनमै निर्वाचनको मिति घोषणा गर्ने तयारीमा सरकार रहेकाले स्थानीय तहको निर्वाचनमा माओवादी केन्द्रलाई पहिलो पार्टीका रुपमा स्थापित गर्न अभियानका रुपमा लाग्न निर्देशन दिए ।
प्रतिक्रिया दिनुहोस !
