दुर्गा थापा मगर मिस ब्युटी क्विन नेपाल २०१६ को उपाधि जितेपछि निकै उत्साहित छिन् । यस प्रतियोगिताबाट धेरै कुरा सिक्ने मौका पाएको बताउने उनको रुचि म्युजिक भिडियोमा छ । छोटो समयमै पहिचान बनाउन सकिने भएकाले युवापुस्ता म्युजिक भिडियोप्रति आकर्षित भएको उनको भनाइ छ । महोत्तरीको गौरीबासमा जन्मेकी २० वर्षीया उनी ६ वर्षअघि राजधानी आएकी हुन् । प्लस टु अध्ययनरत दुर्गासँग यिनै विषयमा भएको संक्षिप्त कुराकानीः
सौन्दर्य प्रतियोगितातिर कसरी आकर्षित हुनुभयो ?
मलाई पहिलेदेखि नै चाहना थियो । मिस ब्युटी क्विन नेपाल आयोजना भएको थाहा पाएपछि भाग लिएँ र शीर्ष उपाधि जित्न सफल भएँ । खुसी लागेको छ ।
अबको योजना ?
मलाई म्युजिक भिडियोमा रुचि छ । प्रस्ताव पनि आइरहेको छ तर अध्ययनले गर्दा समय मिलेको छैन । अब समय मिलाएर काम गर्ने सोचमा छु ।
म्युजिक भिडियोमै रुचि किन ?
छोटो समयमा पहिचान बनाउन सकिन्छ । मलाई मन पर्ने क्षेत्र पनि हो ।
पहिलो म्युजिक भिडियो कोसँग गर्न चाहनुहुन्छ ?
पल शाह । उहाँको अभिनय मलाई एकदम मन पर्छ ।
चलचित्रमा मौका पाउनुभयो भने कोसँग डेब्यु गर्न चाहनुहुन्छ ?
चलचित्रमा चाहिँ त्यति रुचि छैन । भनेजस्तो भयो र अभिनय गर्नु पर्यो भने अनमोल केसी, आर्यन सिग्देल वा आयुष्मान जोशीसँग अभिनय गर्न चाहन्छु ।
कला क्षेत्रमा परिवारको साथ ?
मेरो चाहनामा परिवारको साथ र सहयोग छ । खासगरी दाइ नवराज थापाले मलाई बढी प्रोत्साहन दिनुहुन्छ ।
दाइ कला क्षेत्रमा हो ?
होइन, उहाँ भारतको कलकत्तामा रेस्टुराँ व्यवसाय गर्नुहुन्छ ।
मोडलिङबाट करिअर बनाउन सकिन्छ जस्तो लाग्छ ?
जीवन नै यसैमा समर्पण गर्ने भन्ने होइन । केही समय काम गर्ने हो ।
प्रतिक्रिया दिनुहोस !
