काठमाडौः अन्नपूर्ण पोस्टले माघ २२ गते( आउँदो शनिबार) गर्ने साइकल र्यालीका लागि रुट तय गरेको छ ।
साइकल र्याली अन्नपूर्ण पोस्टको तीनकुने कार्यालयबाट सुरु भएर बानेश्वर, थापाथली हुँदै जाउलाखेल पुग्ने छ । र्याली जाउलाखेलबाट कान्तिपथ हुँदै तीनकुने अन्नपूर्ण पोस्ट कार्यालय परिसरमा अाएर समापन हुने भएको छ । जाउलाखेलबाट पुल्चोक, कुपन्डोल,थापाथली, त्रिपुरेश्वर, सहिद गेट हुँदै कान्तिपथ पुग्ने छ । त्यस्तै कान्तिपथबाट हात्तिसार, भद्रकाली, सिंहदरबार,माइतीघर, नयाँ बानेश्वर हुँदै तीनकुने अन्नपूर्ण पोस्टको कार्यलय परिसरमा पुग्ने छ ।
क्यान्सरको पहिचान, उपचार र रोकथामका लागि जनचेतना जगाउन फेब्रुअरी ४ लाई हरेक वर्ष विश्वभरि नै क्यान्सरबिरुद्धको दिवस मनाइन्छ । अन्नपूर्ण केही वर्षयता हरेक वर्ष यस दिन क्यान्सरबिरुद्ध सर्वसाधारणलाई सचेत गराउन साइकल र्याली आयोजना गर्दै आएको छ । अघिल्लो वर्षको र्याबलीमा हजारौं साइक्लिस्टहरू उपस्थित थिए । र्यालीको नारा 'राइड फर लाइफ' रहेको छ ।
पछिल्लो समयमा भयावह रोगका रूपमा फैलिँदै गएको क्यान्सर समयमै पहिचान गरेर उपचार गर्दा पूर्णतयाः निको हुने भएकाले यसबारे चेतना जगाउन कार्यक्रम आयोजना गरिएको अन्नपूर्णले जनाएको छ । अन्नपूर्णले यस वर्षदेखि पाठेघरको मुखको क्यान्सरको निःशुल्क परीक्षण अभियानसमेत थालेको छ ।
प्रतिक्रिया दिनुहोस !
