विद्यालय व्यवस्थापन समिति चयनमा अभिभावकबीच कुटाकुट

बैतडी : न्वाली गाविसको भूमिराज प्राविमा विद्यालय व्यवस्थापन समिति चयनमा विवाद हुँदा अभिभावकबीच कुटाकुट भएको छ । अध्यक्ष पदका लागि कुटाकुट भएको बताइएको भएपनि विद्यालयले भने गैर अभिभावकले अभिभावकमाथि कुटपिट गरेको बताएको छ।

‘सोमबार दिउँसो विद्यालय व्यवस्थापन समिति चयनका लागि अभिभावको भेला बोलाइएको थियो । एक्कासी गैरअभिभावकले आएर विद्यालयका कर्मचारी तथा अभिभावकमाथि कुटपिट गरे।’

विद्यालयका शिक्षक कल्यानसिंह ऐरीले भने, ‘कुटपीटबाट विद्यालयका कार्यालय सहयोगी प्रेमसिंह ऐरी र अभिभावक बहादुरसिंह ऐरी घाइते भएका छन् ।’

कुटपिटमा संलग्न रहेको भन्दै प्रहरीले प्रेमसिंह, शेरसिंह, मोहनसिंह, जयसिंह ऐरी र रमेश ऐरीलाई नियन्त्रणमा लिएको छ । विद्यालय व्यवस्थापन समिति चयनमा विवादसँगै कुटपिट भएपछि घाइते भएका र कुटपिटमा संलग्नलाई सोधपुछका लागि नियन्त्रणमा लिएको जिल्ला प्रहरी कार्यालय बैतडीका प्रमुख प्रहरी नायब उपरीक्षक हेरम्ब शर्माले बताए । उनले भने ‘दुवै पक्षबीच छलफल गर्छौं त्यसपछि मात्रै विवादको कारण पत्ता लाग्न सक्छ ।’

विद्यालय व्यवस्थापन समिति चयनमा विवाद भएपछि सोमबारदेखि नै विद्यालयमा पठनपाठन अवरुद्ध भएको शिक्षक कल्यानसिंह ऐरीले बताए । शिक्षा ऐनको आठौं संशोधन अनुसार जिल्ला शिक्षा कार्यालयले जिल्लाका सबै विद्यालयमा विद्यालय व्यवस्थापन समिति गठन गरिसक्न निर्देशन दिएको छ।