काठमाडौंः २३ वर्षको अन्तरालमा कम्प्युटर एसोसियसन अफ नेपाल (क्यान) इन्फोटेक विस्तारै आईटीमा आधारित बन्दै गएको छ । ब्लुवर्डमा आयोजना भएको पहिलो क्यानबाट बीआईसीसी भवन हुँदै अहिले काठमाडौंको भृकुटीमण्डपस्थित प्रदर्शनी हलमा आयोजना हुने गरेको क्यान इन्फोटेक मेला प्रविधिको हिसाबले परिस्कृत बनेको छ । क्यान इन्फोटेकले नेपाली प्रविधिको प्रतिनिधित्व गरेको छ ।
नेपाल प्रविधिमा कसरी अघि बढिरहेको छ भन्ने कुरा क्यान इन्फोटेकको २३ वर्षको यात्राले देखाएको छ । अधिल्लो क्यान इन्फोटेकभन्दा यो मेलामा हामीले प्रविधिको प्रयोगमा धेरै परिवर्तन गरेका छौं । यो वर्षबाट सुरु गरेको अनलाइन टिकेटिङ र अनलाइनबाटै पेमेन्ट गर्न सकिने सिस्टम पनि यसको उदाहरण हो ।
साधारण टिकट प्रयोग गर्दै आएका हामीले यस वर्षबाट प्रवेश टिकटमा बारकोड सिस्टमलाई प्रयोगमा ल्याएका छौं । हामी जतिसक्दो यसलाई पेपरलेस बनाउने तयारीमा छौं । क्यान इन्फोटेक प्रविधिको मेला भनिएता पनि यसको सुरुवातको समयमा हामीले सोचेअनुरुप प्रविधिको प्रदर्शन हुन सकेको थिएन ।
विस्तारै यो प्रविधि मेला बन्दै गएको छ । प्रविधिको क्षेत्रमा युवाको लगाव र उनीहरूले निमार्ण गरेका विभिन्न किसिमका प्रविधिको प्रदर्शनीले पनि यो मेलालाई अझ आकर्षक बनाएको छ । क्यानमा वर्षिक रूपमा आउने परिवर्तनले देशमा सबैभन्दा गतिशील क्षेत्र नै प्रविधि भएको मैले पाएको छु ।
आज हरेक मानिसको हातमा मोबाइल पुगेको छ । त्यसमा पनि क्यानको महत्वपूर्ण हात रहेको छ । मोबाइल निर्माण कम्पनीले मोबाइल सस्तोमा निमार्ण गरे पनि त्यसलाई आम समूदायमा पुर्याउन र त्यसको महत्वबारे बुझाउन क्यान इन्फोटेक मेलाले निकै सहयोग गरेको छ ।
मानिस बिदेसिनेबित्तीकै सूचना आदानप्रदानका लागि मोबाइल किन्ने गर्छन् । त्यसले दुरीलाई कम गरिदिएको छ । त्यस्तै मोबाइलबाटै फोन गरेको भरमा भारी बोक्ने भरिया नजिक भएका छन् । म क्यानको सदस्य, कार्यकारी सदस्य, क्यान संघमात्र हुँदा कोषाध्यक्ष हुँदै आज क्यान महासंघको कोषाध्यक्षसम्म आइपुग्दा मलाई यो मेला इभेन्टका रूपमा खासै परिवर्तन भएको जस्तो लागेको छैन ।
हल उस्तै छ, ठाउँ उति नै छ तर यसमा सहभागी हुने कम्पनी, कम्पनीले ल्याउने नयाँ प्रविधि क्यानको विशेषता हो । बर्सेनि यहाँ नयाँ कम्पनीको सहभागिता बढेको छ । मेलामा स्टलको संख्या थपिने क्रम बढिरहेको छ । त्यतिमात्र नभएर अवलोककर्ताको संख्या पनि वार्षिक रूपमा बढ्दै गएको छ ।
अवलोकनकर्ताको आकर्षण र मागले हामीले क्यान इन्फोटेक र क्यानकमटेक भनेर वर्षमा दुई वटा प्रविधिमा आधारित मेला आयोजना गर्दै आएका छौं । मेलामा प्रवद्र्धनभन्दा व्यापार बढी हुँदै गएको गुनासो बाहिर आउने गरेको छ । लाखौंको लगानी गरेर मेलामा सहभागी भएका कम्पनीले व्यापार गरी लगानीको प्रतिफल लिन खोज्नु पनि स्वाभाविक हो । तर यहाँ आउने अवलोकनकर्ता पनि केही सामान किन्ने मनसायले आएका हुन्छन् । तर यसलाई पनि कम गर्ने योजनाका साथ हामीले अहिले ‘बिजनेस डे' भनेर एक दिन छुट्टाउन थालिसकेका छौं ।
हामीले मेलाकैबीचमा दुईदिने सम्मेलन पनि आयोजन गर्ने गरेका छौं । हामीले सम्मेलनको माध्यामबाट प्रविधिका विभिन्न विषयलाई उठाएर बहस गरी बाटो खोज्ने काम पनि गर्दै आएका छौं । आगामी वर्षमा हुने मेलालाई अझ प्रविधिमैत्री बनाउँदै जानुपर्ने त छदैछ ।
प्रविधिको विकासबिना देशको विकास पनि सम्भव नभएकाले प्रविधिको विकासमा जोडदिन क्यानको तर्फबाट सरकासमक्ष पहल गर्ने काम पनि हुनेछ । युवा प्रतिभा र उनीहरूले निमार्ण गरेका नयाँ प्रविधिलाई क्यानले सँधै नै प्राथामिकतामा राखेर अघि बढ्नेछ ।
प्रतिक्रिया दिनुहोस !
