धूमधामसाथ सरस्वती पूजा
जनकपुरधामः श्रीपञ्चमीका अवसरमा विद्याकी देवी सरस्वतीको पूजा आराधना धूमधामसाथ गरिएको छ । जनकपुरसहित मिथिलाञ्चलमा सरस्वती पूजा गरिएको हो । जनकपुरमा सरस्वती पूजा मनोरम रूपले मनाउने गरिन्छ ।
यहाँ राम चोक, महावीर चोक, रामानन्द चोक, मुरली चोकसहित सरकारी तथा निजी विद्यालयहरूमा विद्याकी देवी सरस्वतीको माटोको प्रतिमा स्थापना गरी धूमधामसँग पूजा गरिन्छ । विद्यार्थी बिहानैदेखि पूजापाठमा लाग्ने गर्छन् ।
पूजाको तयारीस्वरूप विद्यार्थी एक महिना अघिदेखि चन्दा उठाउने र समूह बनाएर रकम जम्मा गर्ने गर्छन् । त्यो पैसाले माटोको प्रतिमा किन्ने गर्छन् । प्रतिमा पनि हरेक वर्ष भव्य बनाउने गरिन्छ । स्थानीय कुम्हालेहरू एक महिना पहिलादेखि नै सरस्वतीको प्रतिमा बनाउन व्यस्त हुन्छन् ।
जनकपुरको कुम्भकार कुटीबाट हरेक वर्षझैं यस वर्ष पनि लाखौंको सरस्वती प्रतिमा बिक्री गरिएको छ । यस वर्ष सरस्वती माताको माटोको प्रतिमा पाँच हजार देखि ७५ हजार रुपैयाँसम्ममा बिक्री गरिएको कुम्हालेहरूले बताए ।
पछिल्लो समय सरस्वती पूजामा डीजे बजाएर होहल्ला गर्ने, भड्किला गीतहरू बजाएर अशान्ति फैलाउने गुनासा बढेपछि यस वर्ष स्थानीय प्रशासले पूजाका नाममा उद्दण्डता फैलाउने काम गरेमा कारबाही गर्ने चेतावनी दिएको थियो ।
प्रशासनको कडाइपछि केही हदसम्म भड्किलो क्रियाकलापमा कमी आएको छ । सरस्वती पूजाका अवसरमा विद्यालयहरूमा सांस्कृतिक कार्यक्रम आयोजना गर्नुका साथै प्रतिमा राखेर बनाइएका पण्डालहरूमा समेत विद्यार्थीले नाचगान तथा सांस्कृतिक कार्यक्रम गरेका छन् ।
सरस्वती पूजाको अर्थ विद्या आर्जनमा मन लगाउनु भए पनि पछिल्लो समयमा यसलाई फेसन सोका रूपमा विद्यार्थीले लिन थालेका छन् । यसमा युवा समूहले बढीभन्दा बढी अभद्रता प्रस्तुत गरेर यसको मान्यता नै परिवर्तन गरिदिएकोप्रति साहित्यकार डा. राजेन्द्र विमल आपत्ति व्यक्त गर्छन् । अभिभावकले आआफ्ना बालबालिकालाई यसको महत्व बुझाएर सात्विकताको पाठ सिकाउनुपर्ने विमलको भनाइ छ ।
सरस्वती पूजाकै अवसरमा देशैभरका विद्यालयमा पूजापाठ गरिएको छ । बुधबार काठमाडौं, भक्तपुर, ललितपुरलगायत देशैभरका शैक्षिक प्रतिष्ठानमा विद्यार्थी पुगेर विद्याकी देवी सरस्वतीको पूजाआजा गरेका थिए । विद्यार्थीले आजको दिनलाई विशेष रूपमा मनाउने गर्छन् । सरस्वती पूजा अर्थात् श्रीपञ्चमीका अवसरमा ससाना बालबालिकालाई अक्षरारम्भ गराउने चलन छ ।
आजको दिन अक्षरारम्भ गराए शैक्षिक पाइलामा उत्तम हुने मान्यता छ । यही अवसरलाई विद्यालयहरूले पनि बालबालिका भर्नामा विशेष छुटको सूचना टाँसेर विद्यार्थी भर्ना अभियानलाई तीव्र पारेका छन् ।
प्रतिक्रिया दिनुहोस !
