काठमाडौं : पूर्व उपप्रधानमन्त्री एवम् नेपाली कांग्रेसकी केन्द्रीय सदस्य सुजाता कोइरालाले देशलाई बलियो बनाउन अपराध र आतंकवादविरुद्ध कडा कानुन आवश्यक रहेको बताएकी छिन् ।
जी.पी. कोइराला फाण्डेशनले काठमाडौंको कामाद कलेजमा आयोजित साइबर अपराध सम्बन्धी एक दिवसीय सचेतना मुलुक कार्यक्रममा बोल्दै बलियो कानुन बनाएर देशमा दण्डहीनताको अन्त गर्नुपर्ने बताइन्।
‘देश बलियो बनाउने हो भने अपराध र आतंककारीले टाउको उठाउन नसक्ने गरी कानुन बनाउनुपर्छ,’ उनले भनिन्, ‘अपराधी र आतंककारीले युवालाई तारो बनाएकाले पनि कानुन बलियो चाहिन्छ ।’
राष्ट्रभन्दा ठूलो कोही नभएको कोइरालाको भनाइ छ । ‘देशको हितका लागि कस्तो कानुन चाहिन्छ त्यो बनाउनुपर्छ,’ उनले भनिन्, ‘अपराधमा युवाहरू बढी संलग्न हुने भएकाले त्यसतर्फ गम्भीर नभए देशको भविष्य जोखिममा पर्ने खतरा छ ।’
साइबर अपराधमा बढी युवाहरू प्रभावित पारेकोले त्यसविरुद्ध सबै मिलेर लड्नुपर्नेमा उनको जोड छ । आतंकारीले इन्टरनेटको दुरुपयोग गरी युवालाई आतंककारी गतिविधिमा प्रयोग गरेकोमा सबै गम्भीर हुनुपर्ने कोइरालाले बताइन्।
प्रतिक्रिया दिनुहोस !
